ബേബി പ്രോഡക്ടിന്റെ മെഗാ വിജയം

ബേബി പ്രോഡക്ട്സിന്റെ വിപണി എങ്ങനെ പിടിക്കാം, പുതിയ സംരംഭം വിജയിപ്പിച്ചെടുക്കാൻ എന്താണു വഴികൾ തുടങ്ങി സംരംഭകർ അറിയേണ്ട കാര്യങ്ങൾ ഈ രംഗത്തു വിജയം നേടിയ കൈറ്റ് ട്രേഡിങ് കമ്പനിയുടെ സാരഥി എം. എസ്. ഷൈജു പങ്കുവയ്ക്കുന്നു.

പ്രതിസന്ധികളെല്ലാം പിന്നിട്ട് ബാൻഡിന്റെ സാന്നിധ്യം അരക്കിട്ടുറപ്പിച്ച ചരിത്രമാണ് കൈറ്റ് ട്രേഡിങ് (K.I.T.E) കമ്പനിയുടേത്. 5 വർഷമായി കൈറ്റ് എന്ന ബ്രാൻഡിൽ സൈക്കിളുകൾ, വാക്കറുകൾ, സ്കൂൾ ബാഗുകൾ തുടങ്ങി കുട്ടികൾക്കുള്ള ഉൽപ്പന്നങ്ങളുടെ നിർമാണവും വിപണനവുമാണു കൈറ്റ് നടത്തുന്നത്.

ഈസ്റ്റ് ഡൽഹിയിലെ സോഴ്സിങ് യൂണിറ്റ് കൂടാതെ കൊല്ലം ജില്ലയിൽ വട്ടപ്പാറയിൽ നിർമാണ യൂണിറ്റും പ്രവർത്തിക്കുന്നു. തൃശൂരിൽ നിന്നു തെക്കോട്ട് കന്യാകുമാരി വരെ സ്വന്തമായ വിതരണ ശൃംഖലയുൾപ്പെടെ വിപണിയിൽ കൈറ്റ് ഉൽപന്നങ്ങളുടെ സാന്നിധ്യമുണ്ട്. ഈ മേഖലയിൽ 40% വരെ മാർക്കറ്റ് ഷെയറുണ്ടെന്നാണ് ഏകദേശ കണക്ക്. സൈക്കിളുകളുടെയും വാക്കറുകളുടെയും ഫ്രെയിമുകൾ സ്വന്തം ഡിസൈൻ നൽകി ഓർഡർ അനുസരിച്ചു വാങ്ങുകയാണു പതിവ്. ഗുണമേന്മ ഉറപ്പു വരുത്താൻ പല പാർട്സുകളുടെയും നിർമാണം ഔട്ട്സോഴ്സ് ചെയ്യുന്നുമുണ്ട്. ഡൽഹിയിലെയും ഉത്തർപ്രദേശിലെയും കമ്പനികളെ ഇതിനായി പ്രയോജനപ്പെടുത്തുന്നു.

ആറു മാസത്തിനകം ട്രാക്കിലാക്കി

പ്രവർത്തനം തുടങ്ങി ആറു മാസത്തിനുള്ളിൽത്തന്നെ കമ്പനി ബേക്ക് ഈവനായി. മൂന്നു കോടി രൂപയ്ക്കു മുകളിലാണ് കൈറ്റിന്റെ ശരാശരി വാർഷിക വിറ്റുവരവ്. കോവിഡിനോടു പോരാടി നിന്നിട്ടും മാസം തോറുമുള്ള വിറ്റുവരവ് 25 ലക്ഷത്തിൽ താഴെ പോയില്ല.

ഡീലർമാരെ പരമാവധി വിശ്വാസത്തിലെടുത്തും അവർക്കു ബാധ്യത വരുത്താതെ നോക്കുന്നതിനാലും ശരാശരി 10% ലാഭമാണ് ഉള്ളതെന്നു കൈറ്റ് ട്രേഡിങ് കമ്പനിയുടെ മാനേജിങ് ഡയറക്ടറും സിഇഒയുമായ ഷൈജു പറയുന്നു.