ചക്കകൃഷിയിൽ സലീം സൂപ്പർ ഏർലി

ചക്കകൃഷിയിൽ പുത്തൻ പരീക്ഷണവുമായി മികച്ച വരുമാനം നേടുകയാണ് മലപ്പുറം വണ്ടൂർ സ്വദേശി സലീം

- റഷാദ് കൂരാട്

കോവിഡി നും ലോക്ഡൗണിനും മുമ്പുവരെ ചക്കയെക്കുറിച്ച് അത്ര കാര്യമായി ചിന്തിച്ചിരുന്നില്ല, നമ്മളിൽ പലരും. നാട് അടച്ചിട്ടപ്പോൾ ഭക്ഷ്യസാധനങ്ങൾക്ക് മാർക്കറ്റ് തേടിപ്പോകാൻ സാധിക്കാതെ വന്നപ്പോഴാണ് അടുക്കളയിൽ ചക്കയും ചക്കുരുവും മാങ്ങയും മറ്റു നാടൻ കായ്കനികളുമൊക്കെ നിറഞ്ഞത്. ചക്ക ഒരു ബിസിനസാണെന്ന ചിന്ത കൂടുതൽ പേരിലേക്ക് എത്തിയതും ഈ സമയത്തുതന്നെ. അഞ്ചേക്കറോളം സ്ഥലത്ത് ചക്കകൃഷി ചെയ്ത് വിജയം നേടിയ ഒരാളുണ്ട് മലപ്പുറം ജില്ലയിൽ. വണ്ടൂർ കോട്ടമ്മൽ സലീം എന്ന കർഷകനാണ് പുത്തൻ പരീക്ഷണവുമായി വിജയവഴിയിലുള്ളത്.

തലമുറ കൈമാറിവന്ന ചക്കക്കമ്പം

 വണ്ടൂർ ഗ്രാമപഞ്ചായത്തിൽ വാണിയമ്പലം -അമരമ്പലം റോഡിൽ അത്താണിക്കൽ കയറ്റത്തിനടുത്ത് റോഡരികിലെ വിശാലമായ തോട്ടം കണ്ടാൽ ആരും ഒന്നു നോക്കും. വലിയ ഉയരത്തിലല്ലാതെ നീണ്ടുകിട ക്കുന്ന തോട്ടത്തിലേക്ക് കയറിച്ചെന്നാൽ ഏതു കാലത്തും കായ്ച്ചുനിൽക്കുന്ന വിവിധയിനം പ്ലാവുകൾ. ഇതേക്കുറിച്ച് സലീമിനോട് ചോദിച്ചാൽ ഒരു ലോഡ് ചക്കവിശേഷങ്ങൾ കേൾക്കാം.

ഇദ്ദേഹത്തിന്റെ കുടുംബവും മുൻതലമുറക്കാരുമെല്ലാം കാർഷിക മേഖലയോട് ഇഴുകിച്ചേർന്നവരാണ്. ജോലിയുമായി സൗദിയിലാണ് ഒരുപാടുകാലം കഴിഞ്ഞത്. ഫ്രൂട്ട്സ് ആൻഡ് വെജിറ്റബ്ൾസ് മേഖലയിൽ ഭക്ഷ്യവസ്തുക്കളെക്കുറിച്ച് പഠിക്കാനും മനസ്സിലാക്കാനും ജോലി ഏറെ സഹായിച്ചു.