ബഷീറിന്റെ സ്വപ്ന സഞ്ചാരങ്ങൾ

അപകടം തളർത്തിയ ശരീരവുമായി വിധിയെ പഴിക്കുകയല്ല ബഷീർ പാണപ്പുഴ. അതീവ ദുർഘടവും ലോകത്തെ ഉയരം കൂടിയ ചുരങ്ങളിലൊന്നുമായ ഹിമാലയത്തിലെ കർദുങ് ലാ പാസും കടന്ന് യാത്ര തുടരുകയാണ് ഈ 50കാരൻ

- ടി.വി. സ്വാലിഹ്

അന്നൊരു പെരുന്നാൾ യാത്ര കഴിഞ്ഞ് മടങ്ങും വഴിയായിരുന്നു ജീവിതമാകെ തകിടം മറിച്ച്, അപകടം ബഷീറിന്റെ ജീവിതത്തിലേക്ക് വില്ലൻ വേഷത്തിൽ കടന്നുവരുന്നത്. ഗുരുതര പരിക്കേറ്റ് കിടപ്പിലാവുന്നു. ജീവനും ജീവിതവും എല്ലാം അവസാനിച്ചെന്ന് കരുതി. എന്നാൽ, ആ ദിവസത്തെ പാഴ്കിനാവെന്നു വിളിക്കും ബഷീർ പാണപ്പുഴ.

അരക്കുതാഴെ തളർന്ന ഈ മനുഷ്യൻ ഇന്ന് ജീവിതം തിരികെപ്പിടിക്കുന്നത് യാത്രയിലൂടെയാണ്. ദിവസങ്ങളും ആഴ്ചകളും കടന്ന് മാസങ്ങൾ നീളുന്ന യാത്രകൾ. ബഷീർ ഇപ്പോൾ സഞ്ചാരത്തിന്റെ പര്യായപദമാണ്. സഞ്ചാരത്തിനുവേണ്ടി സ്വന്തമായി വണ്ടിവരെ നിർമിച്ചു അദ്ദേഹം.

കൊഴിഞ്ഞാമ്പാറയിലെ ആ രാത്രി

 വർഷം 1992. ഊട്ടി-കൊടക്കനാലിൽ പെരുന്നാൾ ആഘോഷിക്കാനാണ് കണ്ണൂർ പയ്യന്നൂരിനടുത്ത പാണപ്പുഴയിലെ കുറച്ച് യുവാക്കൾ ഇറങ്ങിയത്. ജീപ്പിൽ അടിച്ചുപൊളിച്ച് യാത്ര പോയി. തിരിച്ചുവരുമ്പോൾ എല്ലാവരും പാതിമയക്കത്തിൽ. പാലക്കാട് കൊഴിഞ്ഞാമ്പാറയിൽ എത്തിയപ്പോൾ പെട്ടെന്ന് കൂട്ടിയിടിയുടെ ഘോരശബ്ദം. ജീപ്പിന്റെ മുൻ സീറ്റിലിരുന്ന ബഷീർ എന്ന 21കാരന്റെ കണ്ണിൽ ഇരുട്ടു കയറി, ജീവിതത്തിലും.

ഇവർ സഞ്ചരിച്ച ജീപ്പ് ലോറിയുമായി കൂട്ടിയിടിച്ചു. ബഷീറിന്റെ നട്ടെല്ലിന് പരിക്ക്. സുഷുമ്ന നാഡിയിൽ പൊട്ടൽ. ആദ്യം പാലക്കാട് ജില്ല ആശുപത്രിയിൽ. പിന്നീട് കോഴിക്കോട് മെഡിക്കൽ കോളജിൽ രണ്ടു ദിവസം. അവിടെ തിരിഞ്ഞു നോക്കാതായതോടെ നേരെ മംഗലാപുരം ഫാ. മുള്ളേഴ്സ് ആശുപത്രിയിൽ.

അപകടം നടന്ന് 48 മണിക്കൂറിനുള്ളിലെങ്കിലും എത്തിയിരുന്നെങ്കിൽ വല്ലതും ചെയ്യാമായിരുന്നുവെന്ന് ഡോക്ടർമാർ. പക്ഷേ, ആ വിലപ്പെട്ട സമയം കോഴിക്കോട് മെഡിക്കൽ കോളജിൽ അവഗണന ഏറ്റുവാങ്ങി നഷ്ടമായി. രണ്ടുമാസം മംഗലാപുരത്ത് ചികിത്സ. ജീവിത കാലം മുഴുവൻ കിടക്ക തന്നെ ശരണമെന്ന് ഡോക്ടർമാർ വിധിയെഴുതി. വീട്ടിലേക്ക് മടങ്ങി. പിന്നീട് രണ്ടുവർഷത്തോളം പല ചികിത്സയും നടത്തിയെങ്കിലും ഫലമുണ്ടായില്ല. ആഗ്രഹങ്ങൾ ഉള്ളിലൊതുക്കി വിധിയെ പഴിച്ച് കിടന്നു.

കിടക്കയിലെ ഇലക്ട്രോണിക് റിപ്പയർ