മുഹബ്ബത്തിന്റെ പറുദീസയിൽ

സിനിമയിൽ കൂടുതലും വില്ലൻ വേഷമാണെങ്കിലും ജീവിതത്തിൽ കംപ്ലീറ്റ് ഫാമിലി ഹീറോയാണ് അബൂസലിം.അഭിനയജീവിതത്തിൽ 45ന്റെ നിറവിലുള്ള ഈ വയനാട്ടുകാരന്റെ കുടുംബവിശേഷത്തിലേക്ക്...

- എസ്. മൊയ്തു

വില്ലൻ, ഗുണ്ട എന്നൊക്കെ കേൾക്കുമ്പോൾ മലയാളിയുടെ മനസ്സിലേക്ക് ആദ്യം ഓടിയെത്തുന്ന പേരുകളിൽ ഒന്നാണ് നടൻ അബൂസലീമിനേത്. വെള്ളിത്തിരയിൽ കൂടുതൽ വില്ലൻ വേഷമാണെങ്കിലും ജീവിതത്തിൽ കംപ്ലീറ്റ് ഫാമിലി ഹീറോയാണ് ഈ വയനാട്ടുകാരൻ. സിനിമ നടനാകുക, പൊലീസുകാരനാകുക, ബോഡി ബിൽഡറാകുക എന്നീ ആഗ്രഹങ്ങളായിരുന്നു കല്പറ്റ സ്വദേശി ആയങ്കി അബൂസലീമിന്റെ സ്വപ്നങ്ങളിൽ നിറയെ. കഠിനപ്രയത്നത്താൽ ആഗ്രഹിച്ചതൊക്കെയും കൈവെള്ളയിലൊതുക്കിയ ഈ മസിൽമാന്റെ ജീവിതവും മനോഹരമാണ്. സർക്കാർ സർവിസിൽനിന്ന് വിരമിച്ചതോടെ സിനിമ- ബിസിനസ് മേഖലകൾക്കൊപ്പം സാമൂഹിക സേവന രംഗത്തും സജീവമാണ്. സിനിമയും കുടുംബവും വിശേഷങ്ങളും പങ്കുവെക്കുകയാണ് അദ്ദേഹം.

ജീവിതപ്രയാണം

പൊലീസിലായിരുന്ന പിതാവ് നല്ല ഒരു അത്ലറ്റ് കൂടിയായിരുന്നു. അദ്ദേഹത്തിൽ നിന്നുള്ള പ്രചോദനമാകാം ചെറുപ്പത്തിലേ പൊലീസുകാരനാകണമെന്ന മോഹം ഉള്ളിൽ മുളപൊട്ടി യിരുന്നു. കൽപറ്റയിലെ ടാക്കീസിൽ സ്കൂൾ സമയത്ത് വീട്ടുകാരറിയാതെ സിനിമ കാണാൻ പോകുമായിരുന്നു. ഒരിക്കൽ ടാക്കീസിൽ സിനിമ തുടങ്ങുന്നതിനുമുമ്പ് ന്യൂസ് റീലിൽ പ്രത്യക്ഷപ്പെട്ട മസിൽമാന്റെ ശരീരം മനസ്സിൽ കയറിക്കൂടി. പത്രങ്ങളിൽ വരുന്ന ശരീരപുഷ്ടിക്കുള്ള വിവിധ മരുന്നുകളുടെ പരസ്യത്തിലും മസിൽമാന്മാരുടെ ഫോട്ടോയാണ് ഉണ്ടാവുക. അങ്ങനെയാണ് ബോഡിബിൽഡറാവണമെന്ന മോഹം മനസ്സിലുദിച്ചത്. പിന്നീട് നിരന്തര പരിശ്രമത്തിലൂടെയാണ് 1984ൽ കേരളത്തിലേക്ക് ആദ്യമായി മിസ്റ്റർ ഇന്ത്യ പട്ടം എന്നിലൂടെ എത്തുന്നത്.

22-ാം വയസ്സിലാണ് പൊലീസിലെത്തുന്നത്. ആദ്യ പോസ്റ്റിങ് തലശ്ശേരി എം.എസ്.പിയിലായിരുന്നു. സത്യസന്ധമായും അഴിമതിയില്ലാതെയും മുപ്പത്തിമൂന്നര വർഷം സേവനം ചെയ്യാൻ കഴിഞ്ഞിട്ടുണ്ട്. വയനാട് ഇന്റലിജസിൽ നിന്നാണ് വിരമിച്ചത്.