പോരാട്ടം അതിജീവനം

തങ്ങളുടെ സ്വാധീനത്താൽ വിസ്മൃതിയിലായിപ്പോവു മെന്ന് കോഴിക്കോട് മെഡിക്കൽ കോളജിലെ ഉത്തരവാദപ്പെട്ടവർ പോലും കരുതിയ കേസുകളിൽ കുറ്റക്കാരെ നിയമത്തിനും പൊതുസമൂഹത്തിനും മുന്നിൽ നിർത്താൻ കഴിഞ്ഞത് ഇവരുടെ പോരാട്ടവീര്യം ഒന്നുകൊണ്ടുമാത്രമാണ്.

- ടി. മുംതാസ്

"അവരോടൊന്നും മുട്ടാൻ നിൽക്കണ്ട, നമ്മളെക്കൊണ്ട് കൂട്ടിയാൽ കൂടില്ല” -സമൂഹത്തിൽ സ്വാധീനവും അധികാരവുമുള്ളവരിൽനിന്ന് അനീതി നേരിടുന്നവർക്ക് കൂടെയുള്ളവർ നൽകുന്ന ഉപദേശമാണിത്. പ്രിവിലേജ്ഡ് പൊസിഷനിൽ ഇരിക്കുന്നവർക്കെതിരെ ഒരു ചെറുവിരൽ അനക്കാൻ പോലും നമുക്കാ വില്ല എന്ന പൊതുബോധം നിലവിലുണ്ട്. അതിനെ തിരെ നിലപാട് എടുക്കുന്നവരെ പിന്തിരിപ്പിക്കുന്നവർക്കും പഞ്ഞമുണ്ടാവില്ല. ഇര സ്ത്രീയാണെങ്കിൽ പിന്തിരിപ്പിക്കാൻ ആളുകൾ കൂടും.

ഇത്തരം പിന്തിരിപ്പിക്കലുകൾക്കും പൊതുബോധത്തിനും മുന്നിൽ മുട്ടുമടക്കാതെ ഭരണകർത്താക്കളുടെയും അധികാരത്തിന്റെ ഇടനാഴികളിൽ ഏറെ സ്വാധീനമുള്ള മെഡിക്കൽ ബ്യൂറോക്രാറ്റുകളുടെയും അനീതിക്കെതിരെ മുഷ്ടി ചുരുട്ടിയ രണ്ടു വനി തകളുടെ സന്ധിയില്ലാസമരത്തിനാണ് ഒരു വർഷത്തോളമായി കോഴിക്കോട് സാക്ഷിയാവുന്നത്.

12 സെന്റിമീറ്റർ നീളമുള്ള ആർട്ടറി ഫോർസെപ്സ് (കത്രിക) വയറ്റിൽ കുടുങ്ങിയതറിയാതെ അഞ്ചു വർഷത്തോളം അനുഭവിച്ച കഠിന പരീക്ഷണങ്ങളാണ് പന്തീരാങ്കാവ് സ്വദേശി കെ.കെ. ഹർഷിനയെ തെരുവിലിറക്കിയതെങ്കിൽ ഓപറേഷൻ കഴിഞ്ഞ് പാതി തളർന്ന്, ഒന്നുറക്കെ കരയാൻ പോലും കഴിയാത്ത നിസ്സഹായാവസ്ഥയിൽ ആശുപത്രി കിടക്കയിൽ വെച്ച് ഏറ്റുവാങ്ങേണ്ടി വന്ന കൊടിയ പീഡനമാണ് അതിജീവിതയെ പോരാട്ടത്തിലേക്ക് തള്ളിവിട്ടത്. തങ്ങളുടെ സ്വാധീനത്താൽ വിസ്മൃതിയിലായിപ്പോവു മെന്ന് കോഴിക്കോട് മെഡിക്കൽ കോളജിലെ ഉത്തരവാദപ്പെട്ടവർ പോലും കരുതിയ കേസുകളിൽ കുറ്റക്കാരെ നിയമത്തിനും പൊതുസമൂഹത്തിനും മുന്നിൽ നിർത്താൻ കഴിഞ്ഞത് ഇവരുടെ പോരാട്ടവീര്യം ഒന്നുകൊണ്ടുമാത്രമാണ്.