મારે ‘ડોક્ટર’ બનવું હતું પણ..

ડોક્ટર બનવાના સપના સેવતી એક ૧૬ વર્ષની દીકરી, જે આજે ૫૫ વર્ષે અમદાવાદ જેવા મેટ્રો સિટીમાં દેહવ્યાપાર કરે છે. એવું તો શું થયું ઉચ્ચ પરિવારની 'દેવ્યાની’ સાથે કે આજે પ્રૌઢ ઉંમરે પણ ‘લાલી’ બનીને તે ગ્રાહકોની રાહ જુએ છે..?

- હેતલ રાવ

મારે તારી સાથે વાત નથી કરવી..તું રોજ રોજ આવીને મને પરેશાન ન કર..અને હું તારી સાથે વાત કરું તો પણ શું..તારે તો માત્ર એક સ્ટોરી જોઈએ છે..માટે જ આટલા દિવસોથી રોજ અહીં આવે છે અને હું ના કહું એટલે ચાલી જાય છે. સમય થવા આવ્યો છે, મારા ગ્રાહકો આવશે.. આ જગ્યાએ વધારે ઊભા રહેવું તારા માટે સારું નથી..તું નીકળ અહીંથી..’

કેમ આન્ટી, જીભ થોથવાવા લાગી?..બોલો..બોલો. .આખા ગામની વાતો કરશો પણ તમારી વાત નહીં કરો.? મારી બદનામીનો એટલો જ ડર છે તો આપો મારા પ્રશ્નોના જવાબ, પછી તમને પરેશાન નહીં કરું.

જો પહેલાં તો તું મને આન્ટી કહેવાનું બંધ કર, હું કંઈ તારી આન્ટી બાન્ટી નથી. મારું નામ લાલી છે લાલી. .અને તારે પણ મને લાલી જ કહેવાનું, સમજી.

હા સમજી, પણ હવે મને દેવ્યાનીથી શરૂ થયેલી સફરમાં આ લાલીનો જન્મ ક્યારે થયો તેની વાત કરો તો જ આન્ટી નહીં કહું, બાકી તો રોજ અહીં આવીશ, તમને હેરાન કરીશ અને પ્રશ્નો પૂછ્યા કરીશ.. પછી ભલે હું બદ.., ના..ના.. તું એમ ના બોલ..

‘સારું, કાલે આવજે, પણ જરા વહેલી આવજે. મારા ધંધાનો સમય ના બગાડતી.’ તમે સમજી જ ગયા હશો કે ઉપરનો વાર્તાલાપ એક સેક્સ વર્કર અને મારા વચ્ચેનો છે, પરંતુ હું તેમને શું પૂછવા માગું છું અને તે કેમ ના કહે છે, તેની પાછળ ઘણાં રહસ્યો છુપાયેલાં છે. અમદાવાદનો એક ધબકતો વિસ્તાર જ્યાં એએમટીએસ સ્ટેન્ડને બરોબર અડીને એ પ્રૌઢ મહિલા કાયમ સજીધજીને ઊભી રહે છે. ક્યારેક કોઈ બાઈક પર, કોઈ એક્ટિવા પર કે પછી કોઈક વાર મોંઘી ગાડીમાં પણ તેને લેવા આવે છે, છેલ્લાં પંદર વર્ષથી તો તે ત્યાં બેસે જ છે. હા, સમયની સાથે તેનો ચહેરો અને શરીર બંને ઉંમરની ચાડી ખાય છે, પરંતુ આપણે ત્યાં રહેતા હવસના પૂજારી તેનો રોજ ગમે તેમ કરીને ભરી જ આપે છે. તેનું નામ તો દેવ્યાની છે, પરંતુ તેમને તે નામથી ખૂબ જ નફરત છે અને કહેવાતા જીસ્મના ગ્રાહકો તેને ‘લાલી’ નામથી ઓળખે છે. તેમના કહ્યાં પ્રમાણે બીજા દિવસે હું તેમને મળી અને શરૂ થઈ એ કરુણ દાસ્તાન..