નવ દાયકા બાદ ફરી ગિરિમાળાઓમાં ગુંજશે ગાડીની ગુંજ!

દાયકાઓથી અભરાઈએ ચડાવી દેવાયેલા આબુ- અંબાજી રેલવે પ્રોજેક્ટને છેવટે મંજૂરી મળતાં આ પંથકના વિકાસની આશાઓ જાગી છે. અહીંના મહત્ત્વના ગણાતા માર્બલના તેમ જ ખેતપેદાશો સહિતના માલનું પણ મોટા પાયે ઝડપી પરિવહન થશે, જેના થકી લાખો લોકોને રોજગારી પણ પ્રાપ્ત થશે.

- કલ્પેશ તારા

વર્ષ ૧૯૪૭-૪૮માં સયાજીરાવ ગાયકવાડે તારંગાથી નવી રેલવે લાઇન નાખવાનો આરંભ કરાવ્યો હતો. જેમાં અંબાજીને મહેસાણા સુધી જોડવાનો પ્રયાસ હતો. આઝાદી પહેલાં તારંગાથી ટ્રેન સેવા શરૂ થઈ હતી, જે ટ્રેન દાંતાના દલપુરા સુધી જ જતી હતી. આ લાઇનમાં વચ્ચે રંગપુર નજીક રેલના એન્જિન માટે એક કૂવામાંથી પાણી લેવાતું હતું. જે કૂવો આજે હયાત છે. કહેવાય છે કે રંગપુર નજીકના બે ડુંગર વચ્ચેથી આગના તણખા ઝરતા હોવાથી જંગલમાં આગ ન લાગે એટલે આ રેલવેનું કામ અટકાવ્યું અને પછી પાટા ઉખેડી લેવાયા હતા.

આમ, ગાયકવાડે ૧૯૪૮માં કામ તો શરૂ કરાવ્યું પણ આઝાદી મળ્યા બાદ તંત્રએ મહેસાણાતારંગા-અંબાજી રેલ પ્રોજેક્ટને વર્ષ ૨૦૦૦ સુધી અભરાઈએ ચડાવી રાખ્યો. છેલ્લે લોકોની માગરજૂઆતો પછી રેલવે મંત્રાલયે મંજૂરીની મહોર મારી, પરંતુ નાણાંના અભાવે મહેસાણા-તારંગાઅંબાજી પ્રોજેક્ટ અટવાઈ પડ્યો હતો. ફરી પાછો ૨૦૧૪માં તારંગાને આબુ રોડ સાથે જોડવા માટે આશરે ૧૬૯૯ કરોડના પ્રોજેક્ટની સરકારે જાહેરાત કરી, પણ ૨ વર્ષમાં પૂરો થનારો આ પ્રોજેક્ટ માત્ર તારંગા સુધી જ પૂરો થઈ શક્યો.

કેટલું કામ થાય છે એ તો આવનારો સમય જ બતાવશે, પણ રેલવે મંત્રાલયે રૂ. ૨૭૯૮.૧૬ કરોડના અંદાજિત ખર્ચ સાથે તારંગા હિલ-અંબાજી-આબુ રોડ નવી રેલવે લાઇનના નિર્માણ માટે મંજૂરી આપી દીધી છે. જેથી ગુજરાતની વર્ષો જૂની માગ પૂરી થઈ છે. આ રેલવેથી અંબાજી જનારા માઈભક્તોને સારી સુવિધા મળશે. આખી રેલવે લાઇન અરવલ્લીની દુર્ગમ ગિરિમાળામાં નિર્માણ પામશે. જેથી ગુજરાતમાં મનાલી જેવી ટ્રેન મુસાફરીની મજા માણી શકાશે. તારંગાથી આબુ રોડની આશરે ૮૯ કિમીની રેલવે લાઇન ડુંગરાળ વિસ્તારમાં હશે. જેથી પર્યટકો માટે ટ્રેનની સફર યાદગાર બની રહેશે.

અંબાજી એ ભારતની ૫૧ શક્તિપીઠો પૈકીની એક મહત્ત્વની શક્તિપીઠ છે. દર વર્ષે અહીં ગુજરાત અને દેશ-વિદેશથી લાખો માઈભક્તો માનાં દર્શને આવે છે. અહીં ભાદરવી પૂનમના મેળામાં આવતા લાખો માઈભક્તો રેલવેમાં મુસાફરી કરી શકશે. મહત્ત્વપૂર્ણ પ્રોજેક્ટથી ધાર્મિક સ્થળોને મુખ્ય નેટવર્ક સાથે જોડાશે.