અમેરિકામાં પરણવા જવું છે?

આમ જો તમે નોન-ઇમિગ્રન્ટ વિઝા ઉપર અમેરિકામાં પ્રવેશો અને ગ્રીનકાર્ડધારક જોડે લગ્ન કરો તો તમે અમેરિકામાં રહી નથી શકતા, તમને જે સમય આપવામાં આવ્યો હોય એ પૂરો થાય એ પહેલાં તમારે ઇન્ડિયા આવી જવાનું રહે છે

- ડો.સુધીર શાહ

તમે કોઈ પણ પ્રકારના નોન-ઇમિગ્રન્ટ કે ઇમિગ્રન્ટ વિઝા ઉપર અમેરિકા જાવ તો ત્યાં રહેતી ગ્રીનકાર્ડધારક કે સિટીઝન વ્યક્તિ જોડે લગ્ન કરી શકો છો. પરદેશીઓને અમેરિકામાં અમેરિકન સિટીઝન કે ગ્રીનકાર્ડધારક જોડે લગ્ન કરવા ઉપર કોઈ પણ પ્રકારની પાબંદી નથી. બી-૧/બી-૨ વિઝા ઉપર એક બિઝનેસમેન તરીકે બિઝનેસનાં કાર્યો કરવા કે એક ટૂરિસ્ટ તરીકે ત્યાં ફરવા જાવ તો પણ તમે ત્યાં રહેતા ગ્રીનકાર્ડધારક કે અમેરિકન સિટીઝન જોડે લગ્ન કરી શકો છો. અમેરિકાનો કોઈ પણ કાયદો પરદેશીઓને એમના દેશમાં કાયમ માટે રહેતા ગ્રીનકાર્ડધારકો કે એમના નાગરિકો જોડે લગ્ન કરવા અટકાવતો નથી.

હા, પણ જો ગ્રીનકાર્ડધારક જોડે લગ્ન કરો તો એ લગ્નસંબંધના આધારે તમે અમેરિકામાં કાયમ રહી નથી શકતા.

તમે જો કોઈ પણ પ્રકારના નોન-ઇમિગ્રન્ટ વિઝા ઉપર અમેરિકા ગયા હોવ અને પછી ત્યાં રહેતી ગ્રીનકાર્ડધારક વ્યક્તિ જોડે લગ્ન કરો અને એ વ્યક્તિ તમારા લાભ માટે ફેમિલી સેક્ડ(એ) પ્રેફરન્સ કૅટેગરી હેઠળ ગ્રીનકાર્ડની પિટિશન દાખલ કરે તો તમે એ પિટિશન પ્રોસેસ થાય, એપ્રૂવ્ડ થાય, ત્યાર બાદ વિઝા કરન્ટ થાય એની વાટ જોઈને અમેરિકામાં રહી ન શકો. તમને તમારા નોન-ઇમિગ્રન્ટ વિઝા ઉપર અમેરિકામાં પ્રવેશતાં ત્યાં રહેવાનો જેટલો સમય આપ્યો હોય એટલો જ સમય તમે અમેરિકામાં રહી શકો. ગ્રીનકાર્ડધારક જોડે લગ્ન કર્યા હોય એટલે તમે ત્યાં તમને આપવામાં આવેલ સમય કરતાં વધુ રહી ન શકો.