યુવાનોનો બદલાતો અભિગમ અને વિચારસરણી

સરકારી નોકરીથી દૂર હવે આંતર પ્રિન્યોરશિપના અભિગમ તરફ ભારતના યુવાનો જઈ રહ્યા છે. જેમની ઉંમર ૨૦થી ૩૦ની વચ્ચે છે તેમણે પોતાના વેપારમાં અને જીવનમાં ‘રિસ્ક હૈ તો ઇશ્ક હૈ’નો મંત્ર અપનાવ્યો છે

ભારતનું વૈવિધ્ય એ ખૂબ મોટો બોનસ પોઇન્ટ છે. વિવિધ પ્રદેશના અને વિવિધ ક્ષેત્રમાં કામ કરતાં યુવાનો પાસે સ્કિલ્સમાં ઘણું વૈવિધ્ય છે. દર વર્ષે લાખો વિદ્યાર્થીઓ ગ્રેજ્યુએટ થાય છે જેમાંથી ઘણા લોકો હવે સ્ટાર્ટઅપ તરફ વળી રહ્યા છે. કોરોના કાળ પછી ભારતના યુવાન આંતરપ્રિન્યોર્સના અભિગમમાં પણ મોટો બદલાવ જોવા મળ્યો છે. મહામારીએ લોકોને ચીલાચાલુ નોકરીઓથી દૂર રોજગારની નવી તકો વિશે વિચારતા પણ કર્યા છે. સરકારી નોકરીથી દૂર હવે આંતર પ્રિન્યોરશિપના અભિગમ તરફ ભારતના યુવાનો જઈ રહ્યા છે. જેમની ઉંમર ૨૦થી ૩૦ની વચ્ચે છે તેમણે પોતાના વેપારમાં અને જીવનમાં ‘રિસ્ક હૈ તો ઇશ્ક હૈ’નો મંત્ર અપનાવ્યો છે. આ રુઝાનમાં થયેલા ફેરફારે પણ આ સ્ટાર્ટઅપ બૂમ પાછળ મોટો ભાગ ભજવ્યો છે. છેલ્લા કેટલાક સમયથી સ્ટાર્ટઅપ્સને જે પ્રમાણમાં સફળતા મળી છે તેનાથી ઓછામાં ઓછો એક બદલાવ આવ્યો છે, દેશના યુવાનોને એક સંદેશ ગયો છે કે તમે ધારો એ ફિલ્ડમાં, તમારા જ મનગમતા ક્ષેત્રમાં સફળતા મેળવી શકાય છે અને એ પણ જાતે જ સ્ટાર્ટઅપ શરૂ કરીને.