તબિયતને તગડી રાખવા કયું તેલ વાપરશો?

સામાન્ય રીતે ખાદ્યતેલની વાત નીકળે તો એને શરીરમાં વધતી ચરબી માટે મોટા ભાગે ખલનાયક ગણવામાં આવે છે. જોકે વિવિધ ફૂડ પ્રોસેસિંગ ટૅક્નોલૉજી ’ને આ ક્ષેત્રમાં થઈ રહેલાં સંશોધનોને પરિણામે બજારમાં અવનવાં ખાદ્યતેલ આવી રહ્યાં છે જેમના વિશે એવું કહેવાય છે કે એ ‘હેલ્ધી’ એટલે કે ઓછા નુકસાનકારક છે. એવામાં કયું તેલ વાપરવું સારું તે સવાલ થાય છે.

- આર્જવ પારેખ

આપણે ત્યાં એક કહેવત છે, ‘તેલ જુઓ, તેલની ધાર જુઓ'. આ કહેવતનો સંદર્ભ અલગ છે, પરંતુ આજના સમયમાં ખાદ્યતેલોમાં થઈ રહેલા અવિરત સંશોધનો અને ફેરફારોને લીધે હવે એવું કહેવું પડે તેમ છે કે, ‘તેલ જુઓ, બસ તેલ જ જુઓ’. એમાંય ગુજરાતી પ્રજાને તો તેલ સાથે ભવેભવનો અતૂટ સંબંધ છે. તમે ગુજરાતી ખાણું જુઓ તો તેલથી તરબતર જ હોય, શાક તો તેલમાં ડૂબતાં જ દેખાવા જોઈએ. ગુજરાતી પ્રજા એવું જ વિચારે કે, ‘ચરબી જાય તેલ લેવા, અમારે તો મસાલેદાર, ચટાકેદાર, તેલથી તરબોળ જ વાનગી જોઈએ.’ વળી પાછું ગુજરાતી પ્રજાના તેલનો ટેસ્ટ પણ ઊંચો છે, સીંગતેલ અને કપાસિયા તેલ જ મોટા ભાગે ઘરઘરમાં રાજ કરે છે.

છેલ્લા કેટલાક સમયથી લોકોમાં સ્વાસ્થ્ય પ્રત્યે ઘણી જાગૃતિ આવી છે, લોકો એવું વિચારતા તો થયા જ છે કે શરીરને નુકસાનકારક શું છે અને શું નથી. આજકાલ તો ડૉક્ટર્સ પણ એવી સલાહ આપતા હોય છે કે તમે ફલાણું તેલ વાપરો, કોલેસ્ટ્રોલ બહુ વધી ગયું છે. એટલે બદલાતા સમય સાથે બજારમાં નવાં નવાં ખાદ્યતેલોની એન્ટ્રી થઈ રહી છે અને તેની માગ પણ વધી રહી છે.

સૂર્યમુખીનું તેલ

ગુજરાતમાં રહેતી વ્યક્તિને તો એમ જ લાગે કે આ વળી કયું તેલ? પરંતુ જો ભારતની વાત કરીએ તો ૨૫% રસોડામાં સૂર્યમુખીના તેલે આસન જમાવ્યું છે. આ સિવાય જો બજારની વાત કરીએ તો ભારતમાં વેચાતા તેલમાં તેનો ફાળો ૧૦ ટકાથી વધુ થઈ ચૂક્યો છે. સૂર્યમુખીના તેલનો સૌથી મોટો ઉત્પાદક દેશ એટલે યુક્રેન અને સૌથી મોટો આયાતકાર દેશ એટલે ભારત. યુક્રેનના કાળી માટીનાં ખેતરોમાં તેની ખૂબ સારી ફસલ થાય છે. સૂર્યમુખીના તેલની દિવસે ને દિવસે ડિમાન્ડ વધવાનું કારણ છે તેનાથી થતાં સ્વાસ્થ્યલાભ. વિટામિન ઇ કે જે શરીરની ઇમ્યુન સિસ્ટમને મજબૂત બનાવવા માટે જવાબદાર છે એ સૂર્યમુખીના તેલમાં ભરપૂર પ્રમાણમાં મળી આવે છે. આ તેલમાં રહેલ ઓલેઇક એસિડ શરીરમાં કોલેસ્ટ્રોલની માત્રા ઓછી કરવામાં મદદરૂપ નીવડે છે અને તે હૃદયના સ્વાસ્થ્ય માટે ફાયદાકારક છે. તમારી ચામડીને વધુ ચમકદાર બનાવે છે અને કોઈ ઇન્ફેક્શન સામે તમારા શરીરને રક્ષણ આપવાનું કામ કરે છે.

સોયાબીનનું તેલ