અમદાવાદ શહેર વિશ્વના સૌથી મોટા સ્પોર્ટ્સ સિટી તરીકે ઊભરી આવશે

ખેલ મહાકુંભનું સમાપન અને ૩૬મી નેશનલ ગેમ્સનું કર્ટેન રેઇઝર પ્રસ્તુત કરાયું

અમદાવાદમાં ખેલ મહાકુંભની ૧૧મી શૃંખલાના સમાપન અને ૩૬મી નેશનલ ગેમ્સના કર્ટન રેઇઝરના રંગારંગ સમારંભ પ્રસંગે કેન્દ્રીય ગૃહ અને સહકાર મંત્રી શ્રી અમિતભાઈ શાહે જણાવ્યું હતું કે, વડાપ્રધાન શ્રી નરેન્દ્રભાઈ મોદીએ ગુજરાતમાં આરંભેલા રમત-ગમત ક્ષેત્રના વિકાસની સુવાસના પરિણામે જ દસ વર્ષ પહેલાં ખેલમહાકુંભમાં ૧૧ લાખ ખેલાડીઓનું રજિસ્ટ્રેશન આ વર્ષે ૫૫ લાખે પહોંચ્યું છે. આ સાથે, તેમણે અમદાવાદના નરેન્દ્ર મોદી સ્ટેડિયમની સાથે અમદાવાદ શહેરમાં અન્ય સ્પોર્ટ્સ ફેસિલિટીના નિર્માણ બાદ અમદાવાદ વિશ્વના સૌથી મોટા સ્પોર્ટ્સ સિટી તરીકે ઊભરી આવશે, તેવો વિશ્વાસ વ્યક્ત કર્યો હતો.

ગુજરાતના ખેલાડીઓએ પોતાની પ્રતિભા અને પ્રદર્શનથી દેશ અને દુનિયાના નકશા પર અમીટ છાપ છોડી હોવાનું જણાવી શ્રી શાહે નેશનલ ગેમ્સના આયોજનની સાથે ગુજરાત સ્પોર્ટ્સ ક્ષેત્રે નવા કીર્તિમાન સ્થાપિત કરશે તેવો મત વ્યક્ત કર્યો હતો. વડાપ્રધાન શ્રી નરેન્દ્રભાઈ મોદીની દૂરંદેશિતાના પરિણામે ગુજરાતમાં સ્પોર્ટ્સની આંતરરાષ્ટ્રીય સ્તરની માળખાકીય સુવિધાઓ ઉપલબ્ધ બની છે જેના પરિણામે જ ગુજરાતમાં આંતરરાષ્ટ્રીય સ્તરના ખેલાડીઓ તૈયાર થઈ રહ્યા છે એમ તેમણે જણાવ્યું હતું.

વડાપ્રધાનશ્રીએ સ્પોર્ટ્સ ક્ષેત્રે ભારતને વૈશ્વિક ફલક પર પ્રસ્થાપિત કરવા ફિટ ઇન્ડિયા, ખેલો ઇન્ડિયા જ્વા અભિયાન શરૂ કર્યા છે. તેમજ રાષ્ટ્રીય રમતોને પ્રોત્સાહન આપવા વર્ષ ૨૦૧૪ના વિભાગના ૮૬૬ કરોડના બજેટમાં વધારો કરીને આજે ૨૦૦૦ કરોડની રકમની ફાળવણી કરીને રમતગમતને પ્રોત્સાહન આપ્યું છે. તેના પરિણામસ્વરૂપ, વર્ષ ૨૦૧૪ પહેલાં ઑલિમ્પિકમાં બે સુવર્ણ પદક જીતતા ખેલાડીઓની સંખ્યા વધીને આજે ૭ થઈ છે, તો પેરાઑલિમ્પિક તથા એશિયન ગેમ્સમાં સુવર્ણ પદક વિજેતાઓની સંખ્યા વધી છે.