આ મારું કામ નથી

આપણે ત્યાં જૂના જમાનાની પરિવાર વ્યવસ્થામાં સ્ત્રી ફક્ત ઘર સંભાળે અને પુરુષ કમાવા જાય એમ જવાબદારી સ્પષ્ટ વહેંચાયેલી હતી. તેના ફાયદાગેરફાયદા હતા. આજે એ વ્યવસ્થામાં અનેક સ્પર્ધાઓ ઉમેરાતાં સરેરાશ પુરુષો માટે રોજગાર મેળવવો અઘરો થયો છે. સામે મહિલાઓ પસંદગીથી નોકરી-ધંધો કરતી થઈ છે. તેવામાં મારાથી ફલાણું કામ તો ન જ થાય એવી માનસિકતા ગેરવાજબી કહેવાય.

- ડો. મિતાલી સમોવા

હિનાયા દોડતી ભાગતી ઘર બાજુ જઈ રહી હતી. પડોશી હાટકેશભાઈએ સ્કૂટરનું હૉર્ન વગાડીને બેધ્યાનપણે લગભગ દોડી રહેલી હિનાયાનું ધ્યાન પોતાની બાજુ ખેંચ્યું. ‘બહેનબા.. ભટકાઈ જશો તો અમારા ભાઈસાહેબ આ ઉંમરે ક્યાં હવે બીજી પત્ની શોધવા નીકળશે? જાળવીને ચાલો. લાવો એક થેલો મને આપી દો, હું ’ને આ તમારા બહેનપણી મૂકી દઈશું, તમે ત્યાં સુધી ચાલતાં આવો, પણ આટલી બધી વળી શું ઉતાવળ છે? ઘર ક્યાં ભાગી જઈ રહ્યું છે?’

હિનાયા અફસોસ સાથે બોલી, ‘ઘર તો ક્યાંય ભાગી રહ્યું નથી ભાઈ, પણ આ છોકરાઓ બહુ હેરાન કરે છે. મારો મોટો નોકરીથી આવી ગયો હશે, ૨૨ વર્ષનો થયો, પણ જાતે ચાય બનાવતો નથી. આવડે છે બધું, પણ કરતો નથી. નાનો હતો ત્યારે મને બધી મદદ કરાવતો, પણ જુવાન થયો 'ને ભાઈબંધો એની મજાક બનાવે કે હૈં, તું છોકરીઓનાં કામ કરે છે? એટલે હવે તો પાણીનો ગ્લાસ પણ ખસેડતો નથી. નોકરીથી આવીને ભૂખ્યો તરસ્યો બેસી રહે, હું ચા બનાવું તો જ પીવે. હું ના હોઉં તો એના પપ્પા બનાવે, પણ જાતે નથી બનાવતો અને આ સિવાય ઘરનું એકેય કામ કરતો નથી. પહેલાં તો ટાંપાટિયા પણ કરતો, હવે તો એને શરમ આવે છે. ભાઈનો મૂડ હોય તો જ કરે. એના પપ્પા ગમે તેટલા બીમાર હોય તોય ભર વરસાદમાં એ જ દૂધ-શાક લેવા જાય, મારા મોટાને એટલીય દયા ન આવે કે એના ઉંમરલાયક પપ્પા વરસાદમાં પલળીને બીમાર પડી જશે. પોતે ટણી કરીને પગ લાંબા કરીને પલંગમાં ટાઢો થઈને પડી રહે, જાણે એ કુંવર હોય અને અમે માબાપ એના નોકર. આવું ’ને આવું રહ્યું તો કઈ છોકરી આવા આળસુ ’ને ટણીવાળાને નભાવશે ભઈ, એ જ ચિંતા રહે છે. અત્યારે જુઓ, ઘરે જઈશ તો પાણી આવી ગયું હશે, પણ ભાઈ ટાંકીનો કૉક ચાલુ કરવાની તસ્દી પણ નહીં લે, એને ખબર છે તોય. ખબર નહીં કેમ આવું કરે છે?’ હાટકેશભાઈએ સૂર પૂરાવ્યો કે, ‘બહેન, અમારેય ઘરમાં નવાનવા જુવાન દીકરા-દીકરી આવી જ રીતે કામ બાબતે માથે પડેલાં છે. આખો દિવસ ફોન લઈને બેસી રહે, પણ મમ્મી-પપ્પાને લગીરેય મદદ કરતાં નથી. ઉપરથી કશુંક કહો તો સામે ઝઘડવા લાગે. જોકે એમની સ્કૂલની પેરેન્ટ્સ મિટિંગમાં એક ડૉક્ટર આવેલા, તેમણે કહેલું કે નવયુવાનો અને ટીનેજરોમાં આ સામાન્ય વર્તન હોય, સુધરી જશે.' બંને સમદુખિયા વાતો કરી ઉતાવળે ઘરે જવા નીકળ્યાં.