PM મોદીએ ભારતનું સૌપ્રથમ સતત સૌર ઊર્જાથી સંચાલિત મોઢેરા ‘સૂર્ય ગ્રામ’ રાષ્ટ્રને સમર્પિત કર્યું

વડાપ્રધાનશ્રીના હસ્તે મહેસાણામાં રૂ. ૩૦૯૨ કરોડથી વધુના વિવિધ વિકાસકાર્યોના લોકાર્પણ અને ખાતમુહૂર્ત સૂર્યની જેમ વિકાસનો પ્રકાશ દેશભરમાં સર્વત્ર ફેલાય તે માટે સરકાર કટીબદ્ધ: વડાપ્રધાન શ્રી નરેન્દ્રભાઈ મોદી

વડાપ્રધાન શ્રી નરેન્દ્રભાઈ મોદીએ મહેસાણા ખાતેથી ભારતનું સૌ પ્રથમ સતત સૌર ઊર્જાથી સંચાલિત મોઢેરા ‘સૂર્ય ગ્રામ’ રાષ્ટ્રને સમર્પિત કરતા જણાવ્યું હતું કે, આ સૂર્ય ગ્રામના લોકાર્પણ સાથે જ સમગ્ર ઉત્તર ગુજરાત વિકાસની નવી ઊર્જાનું કેન્દ્ર બન્યું છે. ભગવાન સૂર્યના ધામ મોઢેરામાં શરદ પૂર્ણિમા અને મહર્ષિ વાલ્મીકિની પુણ્યતિથિનો ત્રિવેણી સંગમ રચાયો છે. સૂર્યની જેમ વિકાસનો પ્રકાશ દેશભરમાં સર્વત્ર ફેલાય તે માટે સરકાર કટીબદ્ધ છે તેમ તેમણે ઉમેર્યું હતું.

વડાપ્રધાનશ્રીએ વધુમાં જણાવ્યું હતું કે, આસ્થા અને ટૅક્નોલૉજીનો સમન્વય થતાં અનેક લોકોનાં સપનાં સાકાર થઈ રહ્યાં છે. સાથે-સાથે સ્માર્ટ ગુજરાત - ભારતનો સંકલ્પ સાકાર થઈ રહ્યો છે. મોઢેરા ‘સૂર્ય ગ્રામ’ જાહેર થતાં મોઢેરા સહિત સમગ્ર ઉત્તર ગુજરાત માટે આ અનેરો અવસર આવ્યો છે. સૂર્ય મંદિર માટે ઓળખાતું ગામ હવે ‘સૂર્ય ગ્રામ’ તરીકે પ્રખ્યાત બન્યું છે.

તેમણે ઉમેર્યું હતું કે, વિશ્વના પર્યાવરણ ઇતિહાસમાં મોઢેરાનું નામ સુવર્ણ અક્ષરે અંકિત થશે. મોઢેરા સૂર્ય મંદિરને ધ્વસ્ત કરવા આક્રાંતાઓએ અનેક પ્રયાસો કર્યા હતા, સંખ્યાબંધ અત્યાચાર થયા હતા. આજે પૌરાણિક મહત્ત્વ સાથે વિશ્વ આખા માટે મોઢેરા મિસાલ બન્યું છે. વિશ્વમાં સૌર ઊર્જાની વાત થશે ત્યારે મોઢેરાનો ઉલ્લેખ અવશ્ય થશે. મોઢેરા ગામમાં બધું જ સૂર્ય ઊર્જાથી ચાલતું થયું છે તે આપણા માટે ગૌરવની વાત છે. ૨૧મી સદીના આત્મનિર્ભર ભારત માટે આ વિશેષ ભેટ છે. આગામી પેઢીને સુરક્ષા મળે તે માટે દિવસ-રાત નિરંતર પ્રયાસ આપણે કરી રહ્યા છીએ.

શ્રી મોદીએ જણાવ્યું હતું કે, આ યોજનાથી માત્ર વીજળી જ નહીં, પરંતુ તેના વપરાશ બાદ પૈસા પણ મળશે. તેનાથી વીજબીલમાંથી છુટકારો અને નાણાં પણ મળશે. અત્યાર સુધી સરકાર વીજળી ઉત્પાદન કરતી અને લોકો ખરીદતા હતા, પણ હવે તેમાં બદલાવ આવ્યો છે. લોકો ઘરોમાં સોલાર પૅનલ લગાવે, ખેડૂતો ખેતરમાં વીજળી ઉત્પન્ન કરે અને સરકાર ખરીદે છે, આ પરિસ્થિતિના કારણે લોકોના જીવનમાં બદલાવ આવ્યો છે. હવે સરકાર લોકોને સોલાર ઊર્જા માટે સહાયરૂપ થાય છે. દેશમાં સૌર ઊર્જાથી ચાલતા પમ્પોનું ઉત્પાદન પણ વધ્યું છે, એમ તેમણે વધુમાં ઉમેર્યું હતું.