પગ કપાવીને ઊંચાઈ વધારવાની ખતરનાક ફેશન

અકસ્માત, પોલિયો, જન્મજાત ખોડ વગેરેમાં વિકૃત રહી ગયેલાં હાડકાંને વ્યવસ્થિત કરવા માટે, ૧૯૫૦માં એક રશિયન અસ્થિ નિષ્ણાતે આપ્રકારની પ્રાથમિક કક્ષાની અને ભદ્દી પ્રોસિજર શોધી કાઢી હતી

- વિનોદ પંડ્યા

બીજાની હાઈટ (ઊંચાઈ) જોઈને ઘણા પોતાને વામણા અનુભવે. પછી એ ઊંચાઈ આર્થિક, માનસિક, વૈચારિક કે ભૌતિક હોય. આપણને બધાને આપણા શરીરમાં કોઈક ને કોઈક ઊણપ જણાય છે. જ્યારે નાણાં આવે ત્યારે એ ખામીઓ દૂર કરવાની કોશિશો કરે. ઓછા લોકો છે જે સર્જનહારે આપ્યું હોય તે સ્વીકારી લે છે. એવા ઝાઝા છે જે કુદરતના, ક્રિએશનમાં, સર્જનમાં ખામીઓ શોધતા રહે છે અને મસમોટા ખર્ચ કરી તેને દુરસ્ત કરાવતાં રહે છે. નાક, સ્તન, નિતંબ, ત્વચા, ટાલ વગેરેને આકર્ષક બનાવવા સુધીની ઘણીની પ્રોસિજરો તૈયાર કરી છે અને છેતરપિંડીઓ અખત્યાર કરી છે. પેટની ચરબી દૂર કરવાની અને ટાલ પર બાલ ઉગાડવાના નવા નુસખાની રોજ ત્રણ નવી જાહેરખબરો જોવા મળે છે. દાયકાઓ અગાઉ અખબારોમાં જાહેરખબરો છપાતી, ‘છ ઇંચ ઊંચાઈ વધારો’. માણસ વીપીપી દ્વારા મગાવે ત્યારે પાર્સલના અંદરથી પુસ્તિકા નીકળતી. સોનેરી સલાહ લખી હોય કે છ ઇંચની એડીવાળા શૂઝ કે સેન્ડલ બનાવડાવો. બાદમાં તે શૂઝને ઢાંકી દે એટલું લાંબું પેન્ટ સિવડાવો. ત્યારે એ હાસ્યાસ્પદ લાગતું, પણ આજે છ ઇંચના પ્લેટફોર્મ કે હાઈ હિલ્સ ફૅશનનો ભાગ ગણાય છે. અનેકને શારીરિક ઊંચાઈ પ્રાપ્ત કરવી છે અને નવી પદ્ધતિ નીકળી છે તે લાંબા કરી દે તો પણ લોકો કરાવે છે.

પગ કાપીને લાંબા બનવાની પ્રોસિજર હમણાં હમણાં વ્યાપક બનતી ચાલી છે. ખાસ કરીને પશ્ચિમના દેશોમાં. જે પુરુષોની ઊંચાઈ સવા પાંચથી સાડા પાંચ ફૂટ જેટલી અને જે સ્ત્રીઓ સાડા ચારથી પાંચ ફૂટની હોય તે ઑર્થોપેડિક-કોસ્મેટિક સર્જનના શરણમાં જાય છે, લાખો-કરોડો રૂપિયાનો ખર્ચ કરી, થોડા ઊંચા, થોડા લાંબા થઈ ફરે છે.