નૂતન વર્ષમાં ‘ખબર પૂછવા' જવાનો સંકલ્પ!

આ વર્ષે મેં પણ એક મહાસંકલ્પ લીધો છે. આમ તો આજ સુધી મારો એક અને એકમાત્ર સંકલ્પ એ જ રહ્યો છે કે કોઈ વર્ષે કોઈ સંકલ્પ જ નહીં લેવો!

- હર્ષદ પંડ્યા ‘શબ્દપ્રીત'

નવા વર્ષનો સાચો ઉપયોગ આનાથી વધારે બીજો કયો હોઈ શકે, કે આ અવસર પર આપણે કેટલાક નવા નવા સંકલ્પો લઈએ! મજબૂત મનના માણસો તો જોકે ભીષ્મ બ્રાન્ડની પ્રતિજ્ઞાઓ લેતા હોય છે. હું રહ્યો કોમનમેન અને ઍવરેજ હસબન્ડ એટલે મેં બહુ કડક પણ નહીં અને બહુ નરમ પણ નહીં, એવા મધ્યમ અવસ્થાવાળા એકાદ-બે સંકલ્પો લેવાનો મહાસંકલ્પ કર્યો!

વાસ્તવમાં તો જીવનને વધારે ઊજળું દેખાડવા માટે (બનાવવા માટે નહીં!) આવા કેટલાક સંકલ્પો ડિટરજન્ટ પાઉડર જેવા હોય છે. સંકલ્પોના નામમાત્રથી જ તમે ઊજળા દેખાવા લાગશો. સંકલ્પોનું પાલન થાય છે કે નહીં, એની પડપૂછ ક્યાં કોઈ કરતું જ હોય છે. આ બાબતે પૂરો સમાજ હવે સમજુ બની ગયો છે. કોઈએ કહ્યું છે ને કે, ‘બોલનેવાલા ઔર સૂનનેવાલા દોનોં યે જાનતે હો, કિ યે જૂઠ હૈ, તો જૂઠ કોઈ અપરાધ નહીં બનતા!’ સંકલ્પોનું પણ આવું જ છે!

જ્યારથી મને મીઠાઈઓ અને સંકલ્પોનું એકસાથે જ્ઞાન થયું છે ત્યારથી મેં એકપણ નૂતન વર્ષ સંકલ્પહીન જવા દીધું નથી. આ બાબતે હું ક્યારેય સ્વાર્થી નથી રહ્યો. મીઠાઈઓ હું લઉં અને સંકલ્પો હું બીજાંને લેવડાવું! શાસ્ત્રોમાં સ્પષ્ટ કહ્યું છે કે જે મનુષ્ય બીજાંનો વિચાર કરે છે એ જ મનુષ્ય ‘માનવ’ કહેવાને લાયક બને છે. કેટલાક સંકલ્પવાદીઓ એવું માનતા હોય છે કે સંકલ્પ ભલે સિદ્ધ ન થાય, સંકલ્પ લેનાર તો ચોક્કસ પ્રસિદ્ધ થઈ જાય છે. આમાં જે સંકલ્પવાદી નિત્યનૂતન સંકલ્પમાં માને છે, એ તો જ્યારે વર્ષ બદલાય છે ત્યારે સંકલ્પો પણ બદલી નાખે છે. આવા લોકો વાસી સંકલ્પમાં માનતા જ નથી. એમનું માનવું એવું એવું હોય છે કે જે માણસ દર નવા વર્ષે સંકલ્પો નથી બદલી શકતો, એ પોતાના જીવનમાં કશું જ બદલી નથી શકતો. જીવનમાં પરિવર્તન લાવવું હોય તો સંકલ્પોમાં પણ પરિવર્તન લાવવું જોઈએ એવો એમનો જીવનમંત્ર હોય છે.

આ વર્ષે મેં પણ એક મહાસંકલ્પ લીધો છે. આમ તો આજ સુધી મારો એક અને એકમાત્ર સંકલ્પ એ જ રહ્યો છે કે કોઈ વર્ષે કોઈ સંકલ્પ જ નહીં લેવો! પણ સમાજમાં વર્ષે વર્ષે નહીં, હવે તો દિવસે દિવસે સંકલ્પવાદીઓ વધતા જાય છે એ જોઈને વાઇફે પણ એવો સંકલ્પ કર્યો કે, ‘હું (એટલે કે વાઇફ પોતે) આજના ૨૦૨૨ના નૂતન વર્ષે સંકલ્પ લઉં છું કે ટિચુડાના પપ્પા પાસે (એટલે કે મારી ખુદની પાસે) ૨૦૨૩ની દિવાળી સુધીમાં મને ચાર હિલસ્ટેશનોની યાત્રા કરાવવાનો સંકલ્પ લેવડાવીશ અને એનું પૂરેપૂરું પાલન કરાવડાવીશ!'