‘ટ્વિટર’નું મુક્ત પંખીઃ નવું આકાશ, નવા પડકાર

ટ્વિટર પાસે જબ્બર ડેટાબેઝ છે અને તો પણ ખોટ ખાતી આ કંપનીનું સુષુપ્ત સામર્થ્ય એલન મસ્ક જાણતા હોય એમ, તે આને એક સુપર એપમાં પલટાવી નાખવાનું સપનું જુએ છે

- સ્પર્શે હાર્દિક

તલવાર કરતાં કલમની તાકાત ઘણી વધારે છે એવું સદીઓથી કહેવાતું આવ્યું છે અને મૉડર્ન યુગમાં, ફક્ત ૨૮૦ શબ્દોમાં (અગાઉ ૧૪૦) વાત કહેવા માટે બંધિત કરતું એક મંચ, આ મર્યાદાને કારણે અમર્યાદિત શક્તિ ધરાવતું બન્યું છે. વાત છે ટ્વિટરની, જેના અમાપ પૉલિટિકલ પાવરને આજે સૌ કોઈ કબૂલે છે અને વિભિન્ન ક્ષેત્રનાં લોકોએ ત્યાં અદબભેર હાજરી પુરાવવી પડે એવો એનો મોભો છે. તાજા સમાચાર પ્રમાણે ટ્વિટરના દરબારમાં સત્તાપલટો થયો છે અને એના તખ્ત પર બિરાજનાર નવા મનુષ્યનું નામ છે એલન મસ્ક. સમાચાર માધ્યમોમાં અવારનવાર, જેને સરળતાથી સમજવા માટે નાસા કે ઇસરોની શ્રેણીમાં બેસાડી શકાય એવી સ્પૅસ-એક્સ અને ટેસલા કંપનીને કારણે ચર્ચામાં રહેતા એલન મસ્કનું નામ હવે એક વિશાળ સોશિયલ નેટવર્કિંગ પ્લેટફોર્મ ટ્વિટર સાથે જોડાઈ ગયું છે.

એલન મસ્ક આધુનિક યુગનો ધનવાન સાથે પ્રજ્ઞાવાન માણસ છે. તે કોઈ વૈજ્ઞાનિક કે સંશોધક ન હોવા છતાં વિજ્ઞાન અને ટૅક્નોલૉજીના વિષયોમાં એના અંગત અને ધંધાકીય રસને કારણે સામાન્ય માણસો કદાચ એને આ બંને ક્ષેત્રની વ્યક્તિ પણ માની બેસતા હોય, પરંતુ એલન મસ્ક મૂળ એક બિઝનેસટાઇકૂન છે, જેણે બુદ્ધિ, ચાતુર્ય અને સાહસના બળે એકથી વધુ ક્ષેત્રમાં ઝંપલાવીને એવી સફળતા અને લોકચાહના પણ મેળવી છે, જે એકવીસની સદીના ઘણા મનુષ્યો ફક્ત કલ્પનામાં જ ઝંખતાં રહી જાય છે.

‘ટ્વિટર’ અર્થાત્ પક્ષીઓ કરે એ ચીં-ચીં અવાજ. સેંકડો યુઝરોના કામના અને નકામા કલબલથી ગુંજતાં ટ્વિટર પર પૂર્ણ અધિકાર મેળવવા માટે એલન મસ્કને ઘણી મહેનત પડી, પણ થોડા નાટ્યાત્મક વળાંકોને અંતે તેણે સફળતા મેળવીને પહેલી જ ટ્વિટ કરી – ‘પક્ષી મુક્ત છે.' શાનાથી મુક્ત એ સમજવું પણ રસપ્રદ છે. સીઈઓ પરાગ અગ્રવાલ, લિગલ અને પૉલિસી ટીમની રૅડ વિજયા ગાઙે સહિત અમુક ટોચના કર્મચારીઓની તરત જ છટણીથી શરૂ કરીને જે રીતે ટ્વિટર ચાલે છે, એ બધામાં જ આગળ જતાં પરિવર્તન લાવવાનો નિર્ધાર જાહેર કરી ચૂકેલ એલન મસ્કે જણાવેલું કે તે અભિવ્યક્તિની સ્વતંત્રતાના મહત્ત્વના મુદ્દા પ્રત્યે ચિંતાને કારણે ટ્વિટર ખરીદવા ઇચ્છતો હતો. તે લખે છે કે, ‘મનુષ્ય સભ્યતાના ભવિષ્ય માટે એક સહિયારા ડિજિટલ ચોકનું અસ્તિત્વ ટકી રહે, જ્યાં વિશાળ વ્યાપ ધરાવતી વિચારધારાઓની વિવેકપૂર્ણ સ્વસ્થ ચર્ચાઓ હિંસાનો આશરો લીધા વગર થઈ શકે, એ આવશ્યક હોવાથી મેં ટ્વિટર ખરીદ્યું છે.’