મારા મિત્ર મોહમ્મદ માંકડ

શ્રી મોહમ્મદ માંકડ તે વખતે લેખક નહીં - એ ગીતો ગાય અને અમે વારંવાર એમને ગીત ગાવાનો આગ્રહ કરીએ. આજે પણ મારી કિશોરકાળની સ્મૃતિમાં હું કોઈવાર એમનો કંઠ સાંભળ્યા કરું છું!

- ભૂપત વડોદરિયા

હું મિત્રોની બાબતમાં મારી જાતને ખૂબ નસીબદાર ગણું છું. મારી જિંદગીના નાનકડા આકાશમાં કેટકેટલા મિત્રોનાં નામ તારાની જેમ ચમક્યા જ કરે છે! દરેક મિત્રે મને જિંદગીની એક અગર બીજી પળે કંઈ ને કંઈ ઉજાસ આપ્યો છે.

મારો જન્મ ધ્રાંગધ્રામાં મારા મોસાળમાં થયો હતો. મારું વતન પાળિયાદ. પાળિયાદમાં મારા મિત્રોમાં મારા કુટુંબની બહારની જે વ્યક્તિઓ સાથે કિશોરકાળમાં મૈત્રી બંધાઈ તેમાં સૌથી આગળ મોહમ્મદ માંકડ. શાળામાં એક મિત્ર કરીમ રહેમાન. મને તેના મરોડદાર અક્ષરોની ઈર્ષા થાય. એક એવા બીજા મિત્ર ઉનડ ભગતના સાળા સ્વ. દાનાભાઈ. એમના તેલથી ચમકતા કાળાભમ્મર વાંકડિયા વાળ જોઉં અને થાય કે મારે પણ આવા વાળ હોત!