બુધપ્રધાન વ્યક્તિને એટેક નથી આવતો; એની પર પત્નીનું વર્ચસ્વ હોય છે..!!

બુધવારે લગ્ન ન થઈ શક્યાનું દુ:ખ પણ કેટલાક તો અનુભવતા હશે, પણ એવા લોકોએ દુઃખી થવાની જરૂર નથી. બુધનું પાનું વીંટીમાં પહેરી લેવું

- હર્ષદ પંડ્યા ‘શબ્દપ્રીત’

બુધનો સ્વભાવ રજોગુણી છે, અમારો બાબુ બૉસ તો રજોગુણીને બીજોગુણી કહે છે. બસ, આને જ બુધનો પ્રતાપ કહેવાય. અમારો આ મિત્ર બુધપ્રધાન છે. બુદ્ધિપ્રધાનની હજુ સુધી મને ખબર નથી પડી. જોકે, એનેય ખબર તો નહીં જ હોય, નહીંતર અમારી મૈત્રી હજુ સુધી ટકી હોય ખરી? બુધપ્રધાન વ્યક્તિમાં વ્યાપારી સમજ કે ગણતરીવાળો સ્વભાવ વધારે જોવા મળે છે. પોતે હંમેશાં પ્રફુલ્લિત અને પ્રસન્ન રહે છે. અલબત્ત, બીજાના ભોગે. આવી વ્યક્તિ જે કંઈ કામ કરે છે તે બૌદ્ધિક કે વૈજ્ઞાનિક પદ્ધતિથી જ કરે છે એવા વહેમમાં રહેવાનું એને ગમતું હોય છે.

બુધનું નંગ એટલે કે રત્નનું નામ છે પાનું. આ જાતક પોતાની આંગળી પર વીંટીમાં પાનું પહેરે કે ન પહેરે પણ એની જીવનકિતાબનું એકેએક પાનું ખુલ્લું થઈ જતું હોય છે. એ ‘ગમે એટલું’ ઢાંકવાનો પ્રયત્ન કરે તો પણ ‘પાને પાને પર લિખા હૈ પઢનેવાલે કા નામ’ - એ રીતે એની જીવન કિતાબનાં દરેક પાનાંને એનો વાંચનાર મળી રહેતો હોય છે. બુધપ્રધાન જાતકનું પ્રિય ધાન્ય મગ છે. મગ ધાન્ય નહીં, પણ કઠોળ છે, મગ ખાનાર કઠોર બની શકે છે. નઠોર બની શકવાની ગૅરન્ટી મગ ન આપી શકે. આ જાતક ભલે ગમ ખાતાં ન શીખ્યો હોય, મગ ખાતાં શીખી જાય છે. જોકે મગ સાથે મગજને કોઈ જ સીધો કે આડો સંબંધ નથી હોતો, છતાં પણ મગની અસર મગજ પર પડતી જ હોય છે. કદાચ એ કારણે જ આ જાતક, નામ ગમે તે હોય, ‘મગન’ થઈને જ ફરતો હોય છે.

આ બધા ગ્રહમંડળમાં માત્ર બુધ જ એવો ગ્રહ છે જેને પશુ તરીકે હાથી પ્રિય છે. બુધપ્રધાન જાતકનો જીવનસાથી ભલેને કોઈ દૂબળો પાતળો હોય, હાથી એનું પ્રિય પ્રાણી છે. શક્ય છે કે આ જાતકના દાંત પણ ચાવવાના અને દેખાડવાના જુદા જુદા હોય, પણ તેથી કરીને એના દાંતની દાણચો રી થાય એવી કોઈ જ શક્યતા છે નહીં. હા, પોર્ટેબલ દાંત હોય તો ચોરી થવાની સંભાવના ખરી.