રશિયા-યુક્રેન યુદ્ધમાં હવે બહુમતીને રસ નથી

કોઈ દેશ બીજા દેશને લિબરલ ભાવે ઓઇલ ’ને ગેસ નથી આપતું આપે કે વેચતું. ટ્રમ્પ દુર્જન છે ’ને રાઇટ વિંગ અમાનવીય છે વગેરે બીજાની લાગણીઓ ઉત્તેજિત કરી પોતાને સત્તા અપાવતી ભાષણબાજી કરીને પોતાનું રાજકારણ રમનારાનો માનવ સેવાનો રેકોર્ડ છે ખરો?

- ગૌરાંગ અમીન

યુક્રેન પારકા પૈસે રશિયા પર દે ઠોક ગોળીબાર કરે જાય

ભલે પારકા પોતાના પેટ ’ને પૉકેટ કાપીને કર ભરે જાય

શું થયું રશિયા ’ને યુક્રેનની લડાઈમાં શું થયું રશિયા ’ને યુક્રેનની લડાઈ વડે? શું થયું રશિયા ’ને યુક્રેનની લડાઈ પછી? પ્રશ્નોના શોખીનો માટે હેડલાઇન પૂરતાં બેચાર પ્રશ્ન પૂછીને છૂપાઈ જવાનો બાલિશ રોમાંચ આપણે નથી માણવો. યુદ્ધથી, યુદ્ધ માટે 'ને યુદ્ધનું બીજું જે થયું હોય તે, મુખ્ય એક અસ૨ જેમણે જાગૃત મન કામમાં લેવું હોય એમને દેખાઈ શકે છે. રશિયા ’ને યુક્રેન સિવાયના દેશોની પ્રજાની થોડી કે વધારે પ્રત્યક્ષ કે પરોક્ષ અવગણના. એમાં જે દેશોએ આ યુદ્ધમાં તરફેણ કે વિરોધમાં સક્રિય ભાગ લીધો છે એમની પ્રજાની તો ઘણા અંશે સીધી અવહેલના થઈ છે. પોતાના દેશમાં ઘણી સમસ્યા હોય ’ને પારકા યુદ્ધને પોતાનું કરીને પોતાના દેશની તાકાત પારકા યુદ્ધમાં વાપરવાથી જે નવી સમસ્યાઓ સર્જાઈ તેની વધુ અવગણના કે અવહેલના હવે કરવા જેવી નથી. તમામ દેશોમાં મોંઘવારીનો રેલો ચારે બાજુથી ધસી આવ્યો છે. પશ્ચિમના દેશોમાં તો ના બોયાય કે ના ચયાય એવી સ્થિતિ થઈ છે. માનવતા, વૈશ્વિકતા ’ને સત્ય જેવી બૂમાબૂમ ઇન્દ્રિયગમ્ય જમા ’ને ઉધાર સામે મીંદડી મિયાઉં થઈ જાય.

ઘણા વ્હાઇટ વેસ્ટર્ન ઇન્ટેલેક્ચ્યુઅલ્સને હવે એક્ચ્યુઅલ આંકડા પંચાઈ રહ્યા છે. અમેરિકા ’ને યુરોપ વર્ષોથી દેવા પર દેવા કરીને એમની પૉલિસી 'ને સ્ટ્રેટેજી અમલમાં મૂકતાં રહ્યા છે. રશિયાને હરાવવા કરોડો ફટાફટ ખર્ચાઈ ચૂક્યા છે, પણ હવે ત્યાંના અક્કલખાનોને લાગે છે કે એલાઇડ દેશો ’ને યુક્રેનની નેતાગીરી વચ્ચે મોટો કંકાસ શરૂ થશે. કેમ કે યુદ્ધને કારણે પેદા થયેલી આર્થિક વેદના હવે બહુ છૂપાવાય કે સહેવાય એવી નથી. સિરિયન વિસ્તારમાં એક સમયે રશિયા એક્ટિવ હતું ત્યારે અમેરિકા ’ને સાથી દેશોએ રશિયા સાથે સીધું સંઘર્ષમાં ઊતરવાનું ટાળ્યું હતું. ત્યારે ત્રીજું વિશ્વ યુદ્ધ ફાટી નીકળે તો? એવી બીક લોકોને બતાવવામાં આવેલી. જ્યારે તાજેતરમાં યુક્રેન તરફથી રશિયાની સામે પડવામાં ત્રીજા વિશ્વ યુદ્ધનો ડર કોઈને ના લાગ્યો. પોતાના દેશ ’ને વિશ્વના અર્થતંત્રના બાર વાગી જશે એવું પણ ખાસ કોઈએ ના કહ્યું, પરંતુ આવક ’ને જાવક જ્યારે ચીસો પાડે ત્યારે બહેરાનું ચેતાતંત્ર પણ ધણધણી ઊઠે.