‘કાંતારા’ના સર્જક રિષભ શેટ્ટી કોણ છે?

ક્રિટિક્સ અને ઑડિયન્સ બેઉની પસંદ પડેલી ‘કાંતારા’ના લખનાર, દિગ્દર્શન કરનાર અને તેમાં અભિનય કરનાર રિષભ શેટ્ટીએ મિનરલ વૉટરની બોટલ અને ચાના પાવડર વેચ્યા છે. તેમણે પ્રોડક્શન હાઉસના ઑફિસ બૉયથી શરૂ કરીને સ્પૉટ બૉય સુધીનાં કામ કર્યા છે. આજે ‘કાંતારા’ ફિલ્મ વિશે તથા તેમની સફર વિશે વાત કરી છે.

- પાર્થ દવે

૩૦મી સપ્ટેમ્બરે કન્નડ ભાષામાં ‘કાંતારા’ ફિલ્મ રિલીઝ થઈ. તેને બહોળો પ્રતિસાદ મળતાં ૧૪મી ઑક્ટોબરે હિન્દીમાં કરવામાં આવી. ભારતભરમાં સફળ નીવડેલી આ ફિલ્મ કન્નડ ભાષી અભિનેતા રિષભ શેટ્ટીએ લખી અને ડિરેક્ટ કરી છે. ફિલ્મમાં મુખ્ય પાત્ર પણ તેમણે જ ભજવ્યું છે. આજે આપણે આ બહુમુખી પ્રતિભાના ધણી રિષભ શેટ્ટી વિશે વાત કરવી છે. એ પહેલાં કાંતારા ફિલ્મમાં શું છે અને ફિલ્મ કેવી છે તે જોઈએ.

‘કાંતારા’માં શું છે?

કાંતારા ફિલ્મમાં રિષભ શેટ્ટીના પાત્રનું નામ શિવા છે, જેના પિતા ‘ભૂતા કોલા’ નામની એક પ્રથા કરે છે. તેમના થકી જ તેમને રાજા પાસેથી જમીન મળી હોય છે. જોકે, શિવાને તેમાં કોઈ રસ નથી હોતો. શિવા કંબાલા (ભેંસોની રેસ!)નો પાક્કો ખેલાડી છે. તે લીલા (સપ્તમી ગૌડા)ને પ્રેમ કરે છે. મા તેને વઢ્યા કરતી હોય છે. એવું થાય છે કે, આ જંગલ સાથે એકરૂપ થઈને રહેતા ગામમાં એક પોલીસ ઑફિસર આવે છે જેને અમુક પ્રશ્નો છે. બીજી બાજુ પેલા શાંતિ ખરીદીને બેઠેલા રાજાના દીકરાને પણ કંઈક તકલીફ થાય છે. આમ થતાં શિવા, રાજા અને પોલીસ ઑફિસર ટકરાય છે.

દૃશ્યકળા અને કથન મજબૂત

‘કાંતારા'ની ખરી મજા તેની સ્ટોરી ટેલિંગ(કથન)માં છે. ચળકતી ગાડીઓ 'ને ચમકતી બહુમાળી ઇમારતો વગેરે મૉડર્ન વિઝ્યુઅલ્સ વચ્ચે અહીં ભેંસો, આપણા જેવા દેખાતા નોર્મલ માણસો, ગામડાની ધૂળ, જંગલ અને પ્રાણીઓ દેખાય છે. શરૂઆતના ભેંસની રેસનાં દ્રશ્યો જ લાજવાબ ફિલ્માવાયા છે. તે રેસ જોઈ રહેલા એક વ્યક્તિના મોઢે સૂચક ડાયલૉગ છે કે, ‘દોડી! ભેંસો ખૂબ દોડી. અને મેં જોયું તો મૅડલ માણસના ગળે લટકે છે!' હજુ એક સૂચક વાત એ છે કે, ભેંસની રેસ જીતનાર વ્યક્તિને ઇનામમાં શું મળે છે? બાઇક!

આ ફિલ્મનું નિર્માણ ‘ કેજીએફ’ બનાવનારા હોમ્બાલે ફિલ્મ્સ કર્યું છે. કહ્યું એમ, ફિલ્મ દ્રશ્યાત્મક રીતે દમદાર છે. તેની વિઝ્યુઅલ ઇફેક્ટ્સ પણ નયનરમ્ય છે.