‘નિસર્ગ નિકેતન’ કુદરતનું ઘર, હજારો વૃક્ષોથી ઘેરાયેલું જોવા જેવું જંગલ

વૃક્ષ વાવો જીવન બચાવો, વૃક્ષ વાવો પૃથ્વી બચાવો, વૃક્ષ આપણા મિત્ર જેવાં અનેક વાક્યો આપણે સાંભળ્યાં છે અને ઘણી જગ્યાએ વૃક્ષ-વાવેતરનું અભિયાન પણ ચલાવવામાં આવે છે. જોકે કોઈ એમ કહે કે બંજર જમીનમાં હજારો વૃક્ષ વાવીને જંગલ બનાવવામાં આવ્યું છે તો, કદાચ આ વાત સાચી ન લાગે, પરંતુ એક નિવૃત્ત શિક્ષક દંપતીએ વર્ષોની તપસ્યા કરી સાત હજાર વૃક્ષની વાવણી કરી એક આખું જંગલ ઊભું કર્યું છે.

- હેતલ રાવ

નિવૃત્તિનો સમય એટલે બાકી રહેલા જીવનને મન ભરીને જીવવાનો સમય, જે કાર્ય નોકરીના કારણે ન થઈ શક્યા હોય તે અધૂરાં કાર્યને પૂર્ણ કરવાનો સમય. એય ને મજાથી હરવું-ફરવું અને પેન્શનના પૈસાથી મોજેમોજ કરવાનો સમય, પરંતુ જ્યારે કોઈ વ્યક્તિ આ બધાથી પર રહીને પોતાનો નિવૃત્તિનો સમય એવા કાર્ય પાછળ પસાર કરે જેનાથી તેમને તો માત્ર આનંદ જ મળે, પરંતુ અબોલ પ્રાણી, જીવજંતુ, પક્ષીઓને નવજીવન મળે, પર્યાવરણનું જતન થાય અને સહેલાણીઓ માટે ફરવાની મનગમતી એક એવી જગ્યા જ્યાં પહોંચીને હાશકારો થાય. તો સાથે જ જીવનમાં કંઈક કરવાની પ્રેરણા પણ મળે તો.. હા, આ વાત બિલકુલ સાચી છે. પાટણ જિલ્લાના શંખેશ્વર તાલુકાના ધનોરા ગામના શિક્ષક દંપતી દિનેશ ઠાકર અને દેવિન્દ્રા ઠાકરે સાવ ઉજ્જડ પ્રદેશમાં સાત હજાર વૃક્ષો વાવીને પ્રકૃતિને જીવંત કરી છે. રણની બંજર જમીનમાં જંગલ ઊભું કરીને પક્ષીઓ માટે નવું ઘર બનાવ્યું છે. આજે હજારો પક્ષીઓ આ જંગલમાં કલરવ કરે છે. એટલું જ નહીં, દર વર્ષે પ્રકૃતિપ્રેમીઓની સાથે અનેક સહેલાણીઓ આ સ્થળની મુલાકાત માટે આવે છે. એમ કહી શકાય કે ગુજરાતમાં ધનોરા ગામમાં સર્જન પામેલું આ જંગલ વૅકેશનમાં જોવા માટેનું એક મનગમતું સ્થળ બની ગયું છે. પક્ષીઓ માટે વરદાન બની રહેલા આ નાનકડા જંગલનું નામ નિસર્ગ નિકેતન છે, એટલે કે કુદરતનું ઘર.