‘નારી તું નારાયણી’ અને મણિપુર જેવી ઘટનાઓ.. જાગો ભારત..

વડાપ્રધાને મીડિયાકર્મીને બાઇટ આપી. મણિપુર મામલે પોતે દુઃખી તથા આક્રોશિત છે, તે જણાવી ત્યાંની ડબલ એન્જિનની સરકારને વચ્ચે લાવ્યા વગર ઘટનાને ૧૪૦ કરોડ દેશવાસીઓની શરમ ગણાવી કેવું ભારત બનાવવાના મનોરથ સેવ્યા હતા આપણા બંધારણના ઘડવૈયાઓએ અને કેવું ભારત બનાવી રહ્યા છીએ આપણે એ જ બંધારણનો હવાલો આપીને?!

- સુધીર એસ. રાવલ

સમગ્ર દેશ અને દુનિયાએ ચાર દિવસ પહેલાં એક ખોફનાક વીડિયો જોયો. આઠસોથી હજારનાં શેતાની ટોળાંએ વંશીય વેરઝેરની આગમાં બે લાચાર અને નિર્દોષ મહિલાને નગ્ન કરી ગામમાં રસ્તા પર પરેડ કરાવી, ગુપ્તાંગો સાથે ચેડાં, સામૂહિક બળાત્કાર અને હેવાનિયતની પરાકાષ્ઠાનું જાહેર પ્રદર્શન કરી આપણી કહેવાતી માનવતા, સભ્યતા, સંસ્કૃતિ, ધર્મ, ન્યાય, નીતિ, દેશપ્રેમ, રાષ્ટ્રવાદ, નાગરિક કર્તવ્ય, સામાજિક કર્તવ્ય, રાષ્ટ્રીય કર્તવ્ય, બંધુત્વ, બંધારણ કે કાયદો અને વ્યવસ્થા જેવા સઘળા આડંબરો અને આવરણોને એકીસાથે એક જ ઝાટકે ચીરી કાઢી માત્ર બે મહિલાઓનાં શરીરને નહીં, પરંતુ આખા દેશને ઉઘાડો કરી દીધો..!! શેતાનોનો સંદેશ સ્પષ્ટ હતોઃ ‘મજાલ છે દેશમાં કોઈની કે ખુલ્લેઆમ એમની આવી હલકટ ગુસ્તાખીને કોઈ રોકી શકે’..?!!

હજુ તો આ એક વીડિયો જ સામે આવ્યો છે. આ ઘટના પણ ૪થી મેની છે. ઇન્ટરનેટ બંધના કારણે હવે તે પ્રકાશમાં આવી છે. પોલીસે નોંધેલી ફરિયાદ અનુસાર તોફાનીઓએ એસોલ્ટ રાઇફલ જેવાં હથિયારો સાથે ગામ પર હુમલો કર્યો ત્યારે પ૬ વર્ષનો એક પુરુષ, તેનો ૧૯ વર્ષનો પુત્ર, ૨૧ વર્ષની પુત્રી અને ૪૨ તથા ૫૨ વર્ષની અન્ય બે મહિલાઓ જીવ બચાવવા ભાગીને પોલીસના શરણે જતાં રહ્યાં હતાં, પણ ટોળું પોલીસની હાજરીમાં જ બે મહિલાને ઉઠાવી ગયું અને પોલીસ તમાશો જોતી રહી. એ સમયે બહેનને બચાવવા વચ્ચે પડેલા ૧૯ વર્ષના ભાઈને તેની બહેનની નજર સામે જ ટોળાંએ ક્રૂરતાપૂર્વક રહેંસી નાખ્યો. બહેન હૈયાફાટ રુદન કરતી રહી અને ત્યાર બાદ નગ્ન પરેડ અને સામૂહિક બળાત્કારની ઘટના બની.

આ ઘટના પ્રકાશમાં આવ્યાને ચાર દિવસ થયા છે. આક્રોશની આગ સાથે દેશનું મસ્તક શરમથી ઝૂકી ગયું છે. ઇન્ટરનેટ ચાલુ થયું એટલે કેટલાક સમાચારો મળી રહ્યા છે. હજ્જારો લોકો વરસતા વરસાદમાં મૌન સરઘસ કાઢીને બેનરો સાથે કાકલૂદી રહી રહ્યાં છે કે મણિપુરને બચાવી લ્યો. ગગનમાંથી વરસતા વરસાદ કરતાં સ્થાનિકોની આંખોનાં આંસુઓના પ્રવાહથી પૂર્વોત્તરનો આ પ્રદેશ વધુ ભીંજાયો છે. કર્ફ્યુના આદેશો છતાં સડકના બંને છેડે સેંકડો મહિલાઓ શિસ્તબદ્ધ બની મીણબત્તીની જ્યોત જલાવી લાંબી લાંબી કતારોમાં ઊભા રહી શાંતિની અપીલ કરી રહી છે. રઝળતી લાશો અને કમકમાટીભર્યાં દશ્યોની ગોઝારી વાસ્તવિકતા વચ્ચે નગ્ન પરેડના સંદર્ભમાં પૂછાતા રાજ્યના મુખ્યમંત્રી એન. બિરેનસિંઘ સહજભાવે કહે છે કે, આવી તો સેંકડો ઘટનાઓ બની છે..!