કલાના માધ્યમ થકી મેળવો કામ અને દામ

બેચલર ઓફ ફાઇન આર્ટ્સના અભ્યાસક્રમમાં વિધાર્થી ડિઝાઇનિંગ, પેઇન્ટિંગ, એનિમેશન, મ્યુઝિક, ફોટોગ્રાફી વગેરેનો અભ્યાસ કરી શકે છે

કલા અભિવ્યક્તિનું માધ્યમ. આપણે અભિવ્યક્તિને માત્ર શારીરિક અંગભંગિમાના દ્રષ્ટિકોણથી નિહાળીએ છીએ, પણ શારીરિક અભિવ્યક્તિનું સીધું જોડાણ આપણા મન સાથે છે. મનમાં જ્યારે એક વિચાર સ્ફૂરે છે ત્યારે શારીરિક અભિવ્યક્તિ એ વિચારને અન્ય વ્યક્તિઓ સુધી પહોંચાડવાનું માધ્યમ બને છે. એક સમય હતો જ્યારે કલાને માન તો આપવામાં આવતું પણ તેને શોખ અને સન્માનના દાયરામાં સીમિત કરી દેવામાં આવી હતી. કોઈ વ્યક્તિ કલાના માધ્યમ થકી અર્થોપાર્જન કરી શકે એ વિચારને સ્વીકારવામાં સમાજને થોડો સમય લાગ્યો. જોકે હવે એ સમય નથી રહ્યો. કલાને લોકો માન પણ આપે છે અને દામ પણ.

અગાઉ એવો સમય હતો જ્યારે કોઈ વ્યક્તિ નૃત્યમાં પારંગત હોય તો લોકો પૂછતા કે નૃત્ય કરે છે બરાબર છે, પણ જીવન નિર્વાહ માટે, રોજગારી મેળવવા માટે શું કરે છે? એવો જ પ્રશ્ન ચિત્રકલા, સંગીત-ગાયકી વગેરેના અનુસંધાનમાં કરવામાં આવતો. હવે કલા થકી પણ રોજગારી મેળવી શકાય છે. વિવિધ ક્ષેત્રોમાં નામ અને દામ કમાઈ શકાય છે. આજે દેશ-વિદેશમાં વિવિધ શૈક્ષણિક સંસ્થાનો છે, જેમાં જુદી જુદી કલામાં સ્નાતક અને સ્નાતકોત્તરની પદવી મેળવી શકાય છે. કલાના ક્ષેત્રમાં જે ડિગ્રી મળે છે તેને બેચલર ઓફ ફાઇન આર્ટ્સ તરીકે ઓળખવામાં આવે છે. આર્ટ એટલે કલા.