બર્થ ટૂરિઝમ

કલમ ૨૧૨(એ)(૧૦) હેઠળ એવો કાયદો ઉમેર્યો કે જેઓ વિઝિટર્સ વિઝા ઉપર અમેરિકામાં બાળકને જન્મ આપવાના ઇરાદાથી દાખલ થતાં હોય એમને પ્રવેશ ન આપવો

- ડો.સુધીર શાહ

અમેરિકાના બંધારણમાં જે ૧૪મો સુધારો કરવામાં આવ્યો છે, જેને ‘ફોર્થટીન અમેન્ડમૅન્ટ’ કહેવામાં આવે છે, એ જે લોકો અમેરિકામાં જન્મ્યા હોય એમને અમેરિકન સિટીઝનશિપ પ્રાપ્ત થવાની ગૅરન્ટી આપે છે.

જે કોઈ વ્યક્તિએ અમેરિકાની ધરતી ઉપર જન્મ લીધો હોય, પછી એનાં માતા-પિતા બંને યા બંનેમાંથી કોઈ પણ એક અમેરિકન સિટીઝન હોય કે ન હોય, અમેરિકાનું ગ્રીનકાર્ડ ધરાવતા હોય કે ન હોય, અમેરિકામાં કાયદેસર વિઝા મેળવીને પ્રવેશેલા હોય કે ન હોય, કાયદેસર વિઝા મેળવીને અમેરિકામાં પ્રવેશ્યા બાદ, એમને ત્યાં રહેવા માટે જેટલો સમય આપવામાં આવ્યો હોય એ પૂરો થઈ ગયા પછી પણ ગેરકાયદેસર અમેરિકામાં રહેતા હોય, ઇલ્લિગલ ઇમિગ્રન્ટ હોય અથવા તો વિઝા વગર કેનેડા યા મેક્સિકોની બોર્ડર ઉપરથી કે પછી અન્ય કશેથી પણ અમેરિકામાં ગેરકાયદેસર પ્રવેશેલા હોય તો પણ જો તેઓ અમેરિકાની ધરતી ઉપર એમના બાળકને જન્મ આપે તો એ બાળકને એણે અમેરિકાની ધરતી ઉપર જન્મ લીધો છે એ કારણસર જ એને જન્મ આપનાર એની મા કે પછી એના પિતા ગમે તે હોય, એને જન્મ આપનાર વ્યક્તિ અપરિણીત સ્ત્રી હોય, પણ એ બાળકને એણે અમેરિકાની ધરતી ઉપર જન્મ લીધો છે આ કારણસર અમેરિકાની સિટિઝનશિપ પ્રાપ્ત થાય છે.