પતિ/પત્ની, માતા/પિતા માટેના ઇમિગ્રન્ટ વિઝા (અમેરિકા અને આપણે)

જાણકાર અને અનુભવી, અમેરિકાના ઇમિગ્રેશનના કાયદાના એક્સપર્ટ, એડ્વૉકેટો યા એટર્નીઓ પાસે જ, એમણે ઇમિગ્રન્ટ વિઝાની અરજી કરાવવી જોઈએ. એ જ એમના હિતમાં છે

- ડો.સુધીર શાહ

ઇમિગ્રન્ટ વિઝા-ઇમિજિયેટ રિલેટિવ' આ શીર્ષક હેઠળના લેખમાં જણાવવામાં આવ્યું હતું કે અમેરિકન સિટીઝનો એમનાં પરદેશી મા-બાપોને તેમ જ પતિ પત્નીને ઇમિજિયેટ રિલેટિવ કૅટેગરી હેઠળ ફોર્મ આઈ-૧૩૦ ભરીને ઇમિગ્રન્ટ વિઝા અપાવી શકે છે. આ પિટિશનોની પ્રોસેસિંગ ફી હાલમાં ૫૩૫ અમેરિકન ડૉલર છે. ફોર્મ આઈ-૧૩૦ જોડે અમેરિકન સિટીઝન પિટિશનરે એક સપોર્ટ લેટર, જેમાં પોતાને લગતી અને એ જેમના માટે ઇમિજિયેટ રિલેટિવ કૅટેગરી હેઠળ ઇમિગ્રન્ટ વિઝાની પિટિશન દાખલ કરી રહ્યા છે એમને લગતી બધી જાણકારી અને એમના સંબંધો વિશે પુરાવાઓ સહિત માહિતી આપવાની રહે છે.

આ પિટિશનો વાર્ષિક ક્વોટાનાં બંધનોથી સીમિત નથી હોતી. પિટિશન જેવી એપ્રૂવ થાય કે લાયકાતો પુરવાર કરીને ઇમિગ્રન્ટ વિઝા મેળવી શકાય છે. એ મળેથી ચાર મહિનાની અંદર અમેરિકામાં પ્રવેશવાનું રહે છે. ત્યાં પ્રવેશ્યા બાદ ‘એલિયન રજિસ્ટ્રેશન રિસીપ્ટ’નું પ્લાસ્ટિકના એક વિઝિટિંગ કાર્ડના કદનું ગ્રીનકાર્ડ આપવામાં આવે છે. ગ્રીનકાર્ડ મળેથી, જો એ લગ્ન સંબંધના આધારે પ્રાપ્ત થયું હોય તો ત્રણ વર્ષ બાદ અને માતા-પિતાના સંબંધોને આધારે આપવામાં આવ્યું હોય તો પાંચ વર્ષ બાદ એ ગ્રીનકાર્ડધારક ઇચ્છે તો નૅચરલાઇઝેશન દ્વારા અમેરિકન સિટીઝન બનવાની અરજી કરી શકે છે, પણ એમણે એ ત્રણ યા પાંચ વર્ષના સમય દરમિયાન ઓછામાં ઓછો અડધો સમય અમેરિકામાં રહ્યા હોવું જોઈએ અને કોઈ પણ વાર લાગલગાટ છ મહિનાથી વધુ સમય અમેરિકાની બહાર રહ્યા હોવું ન જોઈએ. એમની ચાલચલગત સારી હોવી જોઈએ. એમની વિશ્વમાં ગમે ત્યાં આવક હોય, ઇન્કમ ટૅક્સ અમેરિકામાં ભર્યો હોવો જોઈએ અને અંગ્રેજી ભાષા આવડે છે, અમેરિકા વિશે એમને સામાન્ય જ્ઞાન છે એ પુરવાર કરવા માટેની ટેસ્ટ આપી હોવી જોઈએ. અમુક સંજોગોમાં આ ટેસ્ટમાંથી છુટકારો મળી શકે છે.