વસંત-વેલેન્ટાઇન ડે

રેપ્લિકાઃ એ.આઈ. સાથે ઈલુ-ઈલુ!

- સ્પર્શ હાર્દિક

રેપ્લિકા ઍપમાં કાલ્પનિક પાત્ર સાથે રોમૅન્ટિક રિલેશન સ્થાપી શકાય.

રેપ્લિકા ઍપમાં યુઝર્સ રોમાન્સ પછી વર્ચ્યુઅલ પાત્ર સાથે લગ્ન પણ કરે છે.

વર્ચ્યુઅલ પાર્ટનર વાસ્તવિક ન હોવા છતાં વાસ્તવિક પ્રેમી બની જાય છે.

યુજેનિયા એડા નામ એક યુવતીનો ઘનિષ્ઠ મિત્ર, તેત્રીસ વર્ષનો રોમન મૅઝુરેન્કો ૨૦૧૫માં કારની ટક્કર લાગવાથી મૃત્યુ પામ્યો. યુજેનિયાના જીવનમાં એક ખાલીપો પ્રવેશી ગયો. બંનેએ સાથે મળીને ટૅક્નોલૉજી અને મીડિયા ક્ષેત્રે ઘણું કામ કરવું હતું, પણ રોમન ચાલ્યો ગયો. યુજેનિયાની પાસે એની યાદરૂપે શું બચ્યું? સાતેક વર્ષની મિત્રતા અને અઢળક સંભારણાંઓ. કોઈએ રોમનની યાદમાં કૉફી-ટેબલ બુક તૈયાર કરવાનું, તો કોઈએ વૅબસાઇટ લૉન્ચ કરવાનું સૂચવ્યું, પરંતુ યુક્રેનિયા આટલાં વર્ષોમાં તેમણે બંનેએ મેસેજ દ્વારા જે સંવાદ કરેલો, એ વાંચીને રોમનની સ્મૃ તિને વાગોળતી રહેતી. રોમન ડિસ્લેક્સિક હતો એટલે તેના મેસેજ વિચિત્ર જોડણીઓ અને ભાષા શૈલીની રીતે અલગ પડતા હતા.  રોજિંદા કંટાળાજનક કામકાજથી લઈને હળવી રમૂજ અને કટાક્ષ સુધીના હજારો મેસેજના ઢગલામાં યુજેનિયા રોમનના અસ્તિત્વના ટુકડાઓને જાણે શોધીને, એમને જોડીને, એની સાથે સમય પસાર કરતી હતી.