કાળિયાર રાષ્ટ્રીય ઉધાનનાં મહેમાન પંખીઓ હેરિયરની રવાનગી શરૂ

હેરિયર એટલે પટ્ટાઈ ઋતુ પ્રવાસી શિકારી પક્ષી

- જિજ્ઞેશ ઠાકર

ગીરનું જંગલ જંગલ સિંહ માટે તો જાણીતું છે જ એ ઉપરાંત તેની નેસ સંસ્કૃ તિ, માલધારીઓ, વૃક્ષો, વનસ્પતિઓ, અન્ય જીવસૃષ્ટિ પણ જોવાલાયક છે. એ જ રીતે વેળાવદરમાં આવેલા કાળિયાર નેશનલ પાર્કમાં બ્લેક બક સિવાય અન્ય પણ ઘણી વિશેષતાઓ છે. અહીંના ગ્રાસલૅન્ડ એટલે કે ઘાસિયાં મેદાનો, સૂર્યોદય અને સૂર્યાસ્તનો નજારો, લૅન્ડસ્કેપ ઉપરાંત પશુપંખીઓમાં ખાસ જોવાલાયક છે એ હેરિયર પંખીઓ છે. દર વર્ષે શિયાળો ગાળવા માટે કાળિયાર રાષ્ટ્રીય ઉદ્યાનમાં હેરિયર પક્ષીઓ ઉડાન ભરે છે અને વેળાવદરમાં આકર્ષણનું કેન્દ્ર બને છે. વન વિભાગ દ્વારા આ પંખીઓની ગણતરી પણ હાથ ધરવામાં આવે છે.

શિયાળો પૂર્ણ થતાં જ હેરિયર પંખીઓની પોતાના વતન તરફની રવાનગી શરૂ થઈ જાય છે. વાઇલ્ડ લાઇફ વર્લ્ડ અને પર્યાવરણપ્રેમીઓ માટે હેરિયર પંખીઓ રાષ્ટ્રીય ઉદ્યાનમાં શિયાળાના ૩થી ૪ મહિના સુધી જે નિવાસ કરે છે એ ઘટનાને નોંધનીય માનવામાં આવે છે અને સમગ્ર ગુજરાત રાજ્ય માટે આ ગૌરવરૂપ વાત પણ છે. આ વર્ષે પણ અઢીથી ત્રણ હજાર જેટલાં પંખીઓ માઇગ્રેટ થઈને અહીં આવ્યાં હતાં અને હવે ફેબ્રુઆરી મહિનો પૂર્ણ થતા જ વળતી ઉડાન ભરી છે. તેઓ રિટર્ન થઈ રહ્યાં હોવાથી હવે માંડ ૧૦૦-૧૫૦ હેરિયર પંખીઓ ઉદ્યાન આસપાસ જોવા મળે છે. ટૂંક સમયમાં એ પંખીઓ પણ અહીંથી પરત ફરશે.