વાયરલ પેજ

નવો પૈસો, જૂનો પૈસો અને સંપત્તિની સાઠમારી

- સ્પર્શે હાર્દિક

‘અગ્નિપથ’માં જ્યારે વિજય દીનાનાથ ચૌહાણ એક વૈભવી રેસ્ટૉરન્ટમાં પ્રવેશે છે ત્યારે ધીમા અવાજે ગણગણાટ શરૂ થઈ જાય છે. એના જેવો અપરાધ જગતનો માણસ ત્યાં કેવી રીતે? એની હાજરી અન્યોને અસ્વસ્થ કરનારી છે. વિજય ચૌહાણ પાસે આવી જગ્યાએ જવા માટે પૈસા છે, પ્રભાવ છે, પરંતુ એ હજુ ‘ખાનદાન’ ગણાતો નથી. એણે પૈસો ગેરમાર્ગેથી લણ્યો છે એ ખરું, પણ એનો પૈસો હજુ ‘નવો' છે. પૈસા, સંપત્તિ, વૈભવમાં પણ નવું-જૂનું હોય. દાયકાઓથી જેની વંશાવલિમાં વૈભવ વહેતો આવ્યો હોય, એને નોબિલિટી યાને ખાનદાની વારસામાં મળે. એમની પાસે હોય એ ઑલ્ડ મની. પેઢીઓથી માલેતુજાર એવા જે કોઈ પણ પરિવારો અને એમનાં સંગઠનોને ઇલૂમિનાટી સાથે સાંકળવામાં આવે છે, એ બધા ઑલ્ડ મનીના મનુષ્યો. સામે પક્ષે એક વર્ગ એવો પણ છે જે નિષ્ઠાથી, નીતિપૂર્વક અથવા તો યેનકેન પ્રકારેણ ધનદોલત પ્રાપ્ત કરી ઉમરાવ વર્ગમાં ગણના પામવા વાંછુક હોય છે. એમણે પોતાના દમ પર અર્જિત કરેલું અપાર ધન છે ન્યૂ મની. પશ્ચિમની ટૅક-જાયન્ટ કંપનીઓના, આપબળે અમીર બનેલા સ્થાપકો ન્યૂ મનીના મનુષ્યો. ભારતમાં પેઢીઓથી જામેલી કંપનીઓના સર્વેસર્વા ‘ઓલ્ડ મની’ના અને સ્ટાર્ટ-અપ કલ્ચરમાંથી આવતાં, યુનિકૉર્ન કંપનીઓ બનાવી ચૂકેલા યંગ આંતરપ્રિન્યૉર ‘ન્યૂ મની’ના મનેખો કહી શકાય.