રાજકાજ

ટ્રમ્પ પરનો હુમલો ચૂંટણીમાં વિજયને સુનિશ્ચિત કરશે?

- ચાણક્ય

અમેરિકામાં એક ચૂંટણી રેલીમાં ભાષણ દરમિયાન થયેલા હુમલાથી ચર્ચાનું કેન્દ્ર બનેલા ડોનાલ્ડ ટ્રમ્પ પ્રમુખપદ માટે રિપબ્લિકન પાર્ટીના ઉમેદવાર તરીકે સત્તાવાર રીતે જાહેર થયા છે. રિપબ્લિકન પાર્ટીના રાષ્ટ્રીય અધિવેશનમાં ટ્રમ્પને પૂરતી સંખ્યામાં ડેલિગેટના મત મળ્યા પછી તેમને પાર્ટીના સત્તાવાર ઉમેદવાર જાહેર કરાયા છે. આ રીતે ટ્રમ્પ અમેરિકામાં પ્રમુખપદની ત્રીજીવાર ચૂંટણી લડશે. તેમણે ૨૦૧૬માં વિજય મેળવીને અમેરિકાનું પ્રમુખપદ મેળવ્યું હતું. ૨૦૨૦માં તેઓ જો બાઇડેન સામે ચૂંટણી હારી ગયા હતા. પેન્સિલવેનિયાની રેલીમાં તેમના પર થયેલા હુમલાને ટ્રમ્પે એક વિચિત્ર અનુભવ ગણાવ્યો છે. અમેરિકી મીડિયા સમક્ષ વાતચીત કરતાં તેમણે કહ્યું હતું કે તેમને એવું લાગે છે કે ભાગ્ય અથવા ભગવાનની કૃપાથી તેઓ બચી ગયા છે. તેમના પર થયેલો ગોળીબાર એવું સૂચવે છે કે તેમનું મોત નક્કી કરી દેવામાં આવ્યું હતું. ટ્રમ્પ પરના હુમલાની તપાસ અમેરિકાની એફબીઆઇ એજન્સી દ્વારા થઈ રહી છે. પ્રાથમિક તબક્કે એફબીઆઇ એવું કહે છે કે ટ્રમ્પ પર ગોળીબાર કરનાર યુવકે એકલાએ જ આ ઘટનાને અંજામ આપ્યો હતો. તેની સાથે બીજું કોઈ સંડોવાયેલું જણાતું નથી, પરંતુ એફબીઆઇ આતંકવાદના પાસાની દૃષ્ટિએ પણ આ ઘટનાની તપાસ કરે છે.