નવરાત્રી સ્પેશિયલ

ભાવનગરમાં પ્રાચીન અર્વાચીન નવરાત્રી મહોત્સવની રંગત

- જિજ્ઞેશ ઠાકર

એક સમય હતો જ્યારે શેરીઓમાં, સોસાયટીઓમાં બેઠા ગરબા થતા હતા. હવે સમય બદલાયો છે. હવેનો જમાનો ડાંડિયારાસ સાથે અવનવા સ્ટેપ અને પ્રૉફેશનલ આયોજનોનો છે. છતાં પણ ભાવનગરમાં હજુ પણ કેટલીક સોસાયટીઓમાં, સર્કલો ઉપર તેમ જ શેરીઓમાં ગરબા અને રાસની પરંપરા અકબંધ છે. ઉપરાંત ગામડાંઓમાં ભવાઈ, જુદાં-જુદાં નાટકો દ્વારા પણ નવ દિવસ માતાજીનાં પૂજન-અર્ચન થાય છે. ભાવનગર શહેર અને જિલ્લામાં નવરાત્રીનાં પ્રાચીન અને અર્વાચીન એમ બંને સ્વરૂપો જોવા મળે છે.

આ વર્ષે ભાવનગર શહેરમાં પ્રૉફેશનલ આયોજનમાં રંગોલી ગ્રૂપ, ઝાંઝર ગ્રૂપ, નાથ હિલ્સ જેવાં સ્થળોએ યુવાનોનો ક્રેઝ જામ્યો છે. તેના માટે બે મહિના અગાઉથી જ ભાવનગર શહેરમાં અલગ-અલગ ૮૦ જેટલા નવરાત્રી સ્ટેપ શીખવવાના ક્લાસીસ શરૂ થઈ ગયા હતા. જેમાં યુવક ; અને યુવતીઓ નવરાત્રીના સ્ટેપ શીખીને માતાજીની આરાધના માટે સજ્જ છે. તેઓ દર વર્ષે આ રીતે અવનવા સ્ટેપ અને દાંડિયારાસથી નવરાત્રિનાં આયોજનોમાં જોડાય છે. બ્લેક ડે, નેશનલ ડે અન્ય વિવિધ રંગીન દિવસોની થીમ જોવા આકર્ષણનું કેન્દ્ર છે. લચક, ઝમકુડી અને માંડવી જેવા નવા સ્ટેપ સાથે ખેલૈયાઓ મેદાનમાં છે.