નાક અને શરદી - મેઇડ ફોર ઇચ અધર!

નજર સામે જ પ્રવાહીનું પતન જોયું નથી જાતું!

- હર્ષદ પંડ્યા ‘શબ્દપ્રીત’

અમારો એવો મત છે કે શરદી તો નાક હોય એને જ થાય. નાક વગરનાંને શરદી ન થાય. શરદી પણ નાકનું મહત્ત્વ સમજે છે.

હમણાં હમણાં તો નાકનુંય નાક કપાય એવા દહાડા પસાર થઈ રહ્યા છે. એ તો સારું છે કે હાથરૂમાલ હાથવગો હોય છે. નહીંતર, જે નાક બચાવવા આપણે આટઆટલા ધમપછાડા કરતા હોઈએ એ જ નાક ક્યારેક એકાદ છીંકને કારણે ભરી સભામાં આપણું નાક કપાવે... કંઈ કહેવાય નહીં!

જેને શરદી થઈ હોય એનો ચહેરો જોજો . . . એના માટે રોવા જેવો, પણ આપણા માટે જોવા જેવો હોય છે! ભૂકંપના આંચકાની જેમ ૭.૯નો આંચકો લઈને આવતી એકાદ વિનાશક છીંક, નાકની અંદરની દુનિયામાં કેટલી મોટી હોનારત સર્જીને જતી રહે છે, એ તો છીંકપીડિત કે છીંકગ્રસ્ત લોકોને જ ખબર પડે, પણ જિંદગીમાં ક્યારેય એકાદ છીંક તો ઠીક, છીંકનો અણસાર પણ ન આવ્યો હોય એને તો નાક હોય તોય શું અને ના હોય તોય શું કંઈ જ ફરક નથી પડતો!