દાગ અચ્છે હૈ.. ખરેખર?

બર્થડેની સરપ્રાઈઝ ગિફ્ટઃ ધોતીનો રૂમાલ થાય, પણ આ શર્ટનું શું થાય?

- સુષમા શેઠ

ગીતાબહેન ક્યારનાંય ઊંચાં-નીચાં થઈ રહ્યાં હતાં. એમણે આશીને નજીક બોલાવી કહ્યું: ‘આશી, મારે તારા પપ્પાજીને બર્થડ માટે સરસ ગિફ્ટ આપી સરપ્રાઈઝ આપવી છે. કંઈક સજેસ્ટ કર ને.’

‘પપ્પાજી બીજું કંઈ વાપરે કે ન વાપરે, પણ શર્ટ ચોક્કસ કામ આવશે જ. મમ્મીજી, શૉપિંગ માટે ક્યાંય ફરવાની જરૂર નહીં. હું તમને ઑનલાઈન બ્રાન્ડેડ શર્ટ્સના ફોટા બતાવું એમાંથી એમને માટે એક મસ્ત પાર્ટીવેર શર્ટ સિલેક્ટ કરીએ.’ કહી આશીએ આંગળીને ટેરવે મોબાઈલમાં દુકાન ખડી કરી દીધી. અધધધ ચૉઈસ!

ગીતાબહેનને ગમે એ આશીને ન ગમે અને આશીને જે ગમે એ ગીતાબહેનને વધુપડતું મૉડર્ન લાગે. પોણો કલાક મથ્યા પછી છેવટે એક મોંઘા બ્રાન્ડેડ આછા બ્લ્યુ કલરના ચેક્સવાળા શર્ટ પર બન્નેની નજર ઠરી. નિર્ણય લેવાઈ ગયો અને આશીએ ફટાફ્ટ ઑર્ડર પ્લેસ કરી ઑનલાઈન પેમેન્ટ કરી દીધું. ચોથે દિવસે પાર્સલ આવી ગયું અને પાંચમે દિવસે હૅપી બડ઼ે ટુ યુ ગાતાં ગાતાં ગીતાબહેને મુકેશભાઈને સરપ્રાઈઝ ગિફ્ટ આપી. સરપ્રાઈઝ્ડ થયેલા મુકેશભાઈએ હોંશે હોંશે પૅકેટ ખોલ્યું.

‘ગમ્યું ને? કેવું સરસ છે. હવે બહાર કોઈને ત્યાં પાર્ટીમાં જઈએ ત્યારે આ પહેરજો. જેવું-તેવું નથી. બ્રાન્ડેડ છે, હોં. મેં અને આશીએ સાથે મળીને પસંદ કર્યું છે.. અને તમે આ પહેરો ત્યારે મારેય મૅચિંગ કરવું પડે ને? હુંય આવા જ કલરનો સિલ્કનો નવો પંજાબી ડ્રેસ ખરીદી લાવી. ભેગાભેગ મૅચિંગ પર્સ અને સૅન્ડલ લઈ જ લીધાં. શું છે કે આપણી જોડી જામવી જોઈએ. આવા કલરની બુટ્ટી અને પેન્ડન્ટનો ઑર્ડર આપી દીધો છે એ પણ આવતા વીકે આવી જશે.’ ગીતાબહેને અટક્યા વગર પોતાનું આખું શૉપિંગ લિસ્ટ વાંચી કાઢ્યું.

‘હૈં! તારી બહેનું અત્યારથી લઈ લીધું?’ નાની સરપ્રાઈઝ પર મોટી સરપ્રાઈઝથી ડબલ ઝટકો લાગ્યો હોય એમ મુકેશભાઈના હાથમાં પકડેલો ચાનો કપ હલી ગયોઃ ‘ગીતા, મને આવી સરપ્રાઈઝો ના આપતી, હોં. ક્યાંક હાર્ટ બેસી જશે.' મુકેશભાઈએ નાક પર સરકી જતાં ચશ્માં ઉપરથી આંખ કાઢીને જોયું. એમને શર્ટ ખાસ ગમ્યું નહોતું, પણ એવું કહેવાની હિંમત કરે તો જન્મદિવસ ઝઘડાદિવસમાં પરિવર્તિત થઈ જાય.