ઈસરોનો આ ઉપગ્રહ કેમ છે આટલો મહત્ત્વનો?

અમેરિકાની GPS જેવી નેવિગેશન સિસ્ટમ વિકસાવવાની દિશામાં ભારતનું ઔર એક પગલું.

૪...૩...૨...૧ અને લોન્ચ!

સોમવાર, ૨૯ મેની સવારે ચેન્નઈથી આશરે ૧૨૫ કિલોમીટર દૂર આવેલા શ્રીહરિકોટાના લૉન્ચ પૅડ પરથી એક શક્તિશાળી રોકેટ ઊંચકાયું. એની ૧૯મી મિનિટે ભારતીય અવકાશવિજ્ઞાન સંશોધન સંસ્થા (ઈસરો)ના કમાન્ડ સેન્ટરને મિશન સક્સેસફુલ એવો સાંકેતિક સંદેશ આવી ગયો. આ મિશન હતું સ્વદેશી બનાવટનો બીજી શ્રેણીનો નેવિગેશનલ ઉપગ્રહ (NVS-01) અવકાશમાં તરતો મૂકવાનું અને પૃથ્વીથી ૨૫૧ કિલોમીટરની ઊંચાઈએ એને ગોઠવવાનું.

મિશન પૂરું થવા સાથે જ વૈશ્વિક સ્તરે ઈસરોની ટેક્નિકલ સિદ્ધિઓના પુષ્પગુચ્છમાં વધુ ફૂલ ઉમેરાઈ ગયું. આમ તો ઈસરોએ અત્યાર સુધીમાં અનેક સેટેલાઈટ એટલે કે ઉપગ્રહ તરતા મૂક્યા છે. આપણાં ચંદ્રયાન અને મંગલયાન મિશન પણ ઘણે અંશે સફળતાને વર્યાં છે. જો કે અવકાશવિજ્ઞાનમાં આવી અગાઉની સફળતાને બહુ મહત્ત્વ નથી. અહીં દરેકેદરેક પ્રોજેક્ટને અલગ અલગ ત્રાજવે તોળવામાં આવે છે. એમાં પણ NVS-01 તો ભારત માટે પણ વધુ મહત્ત્વ ધરાવતો ઉપગ્રહ છે. એની કામગીરી જ એવી રહેવાની છે.

તોતિંગ રોકેટ દ્વારા તરતો મુકાયેલો નેવિગેશનલ ઉપગ્રહ NVS-01.