એક સે ભલે દો નહી, દો સે ભલે એક..

કૉર્પોરેટ અને બૅન્કિંગ જગતમાં હમણાં એક ઐતિહાસિક ઘટના બની છે, જેમાં પેરેન્ટ કંપનીનું એના દ્વારા જ સ્થપાયેલી કંપની સાથે રિવર્સ મર્જર થયું છે. આ ઘટના છે ‘એચડીએફસી’ના ‘એચડીએફસી બૅન્ક’ સાથેના મર્જરની. શું થશે આ ઘટનાની અસર?

- જયેશ ચિતલિયા

શું તમારી પાસે હાઉસિંગ લોન માટેની દેશની પ્રણેતા અને ટોચની હોમ લોન કંપની એચડીએફસીના શૅર હતા? કેટલામાં ખરીદ્યા હતા?

શું તમારી પાસે એચડીએફસી બૅન્કના શૅર છે? કેટલામાં ખરીદ્યા હતા?

જો તમે આ બન્ને શૅર કંપનીના શરૂઆતના તબક્કામાં ખરીદ્યા હશે અને રાખી મૂક્યા હશે અને તમારી પાસેના શૅરની સંખ્યા પણ મોટી હશે તો આજે તમે મિનિમમ લખપતિ યા કરોડપતિ હોવાનું પાડ્યું. જો તમે આ શૅર પાંચ કે દસ વરસ પહેલાં પણ ખરીદ્યા હશે તો પણ તમારું વળતર અને મૂડીલાભ તમને ધનવાન કહેવડાવે એવા ધરખમ ઊંચા હશે. જો કે હવે આ બન્ને કંપની મર્જર મારફત એક થઈને વિશ્વની સાતમી સૌથી મોટી બૅન્ક બની ગઈ છે. હવે એચડીએફસી એની જ ગ્રુપ કંપની એચડીએફસી બૅન્કમાં ભળી ગઈ છે. એચડીએફસી પેરેન્ટ કંપની હતી. નવા જમાના મુજબ પિતાએ પુત્ર સાથે ભળીને વિકાસની નવી ઊંચાઈ તરફ જવામાં શાણપણ સમજ્યું એમ કહી શકાય.

લાંબી રેસનો પાણીદાર ઘોડો