સિદ્ધિના સરવાળા સરસ, પણ...

G20 સમૂહના દેશોની આગેવાનીના વર્ષમાં વડા પ્રધાન નરેન્દ્ર મોદીએ એમની આયોનક્તિનો પરચો આખી દુનિયાને કાવ્યો અને રાષ્ટ્રને કુશળ નેતૃત્વનું વધુ અેક ઉદાહરણ આપ્યું. જો કે સહમતી હોવી જોઈએ એવા નિર્ણટામાં પણ કોઈને સાથે ન રાખવાની એમની માનવસહજ નબળાઈ સુદ્ધાં બહાર આવી.

- હીરેન મહેતા

મોરબીનો ઐતિહાસિક પુલ તૂટી પડવાની દુર્ઘટના સાથે શરૂ થયેલું વિક્રમ સંવત પાંચ રાજ્યોની વિધાનસભા ચૂંટણીના હોકારા-પડકારા સાથે પૂરું થઈ રહ્યું છે. વૈશ્વિક સ્તરે રશિયા-યુક્રેન યુદ્ધ ઓછું હતું એમ પેલેસ્ટિનના એક હિસ્સા પર રાજ કરતા ઉગ્રવાદી સંગઠન હમસ દ્વારા ઈઝરાયલ પરના હિચકારા હુમલા બાદ પશ્ચિમ એશિયામાં પણ રણમોરચો ખૂલ્યો છે.

ગયા વર્ષના ફેબ્રુઆરીમાં રશિયાએ યુક્રેન પર આક્રમણ કર્યું ત્યારે વિશ્વ હજી કોરોના મહામારીની અસરમાંથી બહાર આવી રહ્યું હતું. આખા મામલામાં ચીનની ભૂમિકા તરફ એક નહીં, પણ બધી આંગળી ચીંધાયેલી હતી અને એમાં રશિયાએ ઊંબાડિયું કર્યું. અમેરિકા સહિત પશ્ચિમના દેશોએ રશિયાનો બહિષ્કાર કર્યો અને એમની સામે ખુન્નસ કાઢવા ચીને રશિયા સાથે મળી ધરી બનાવી લીધી તથા વિરોધી દેશોનું નાક દબાવવા અનેક ચીજવસ્તુની કૃત્રિમ અછત ઊભી કરી હતી.

ઈઝરાયલ-પેલેસ્ટિન વચ્ચેનું યુદ્ધ હજી એ કક્ષાએ પહોંચ્યું નથી એટલે અત્યારે તો આ વિગ્રહની એટલી અસર વર્તાતી નથી, પણ લડાઈ લંબાતી જશે તો ક્રૂડ તેલના ભાવ વધવાથી માંડી અનેક દેશ વચ્ચેનાં સમીકરણ પણ બદલાશે. કોઈ પણ યુદ્ધ મોટા પ્રમાણમાં વિસ્થાપન નોતરે છે અને એને કારણે એક પ્રાંતમાંથી બીજે શરણ લેવા જતા લોકોની સમસ્યા પણ વકરે છે. એશિયા અને આફ્રિકાનાં અનેક રાષ્ટ્રો આંતરવિગ્રહમાં ઘેરાયેલાં છે અને ત્યાંના લાખો નાગરિકોએ, ખાસ તો યુરોપના દેશોમાં નિરાશ્રિત તરીકે ડેરાતંબુ તાણ્યા છે. માનવતાના નામે અત્યારે તો યુરોપ આ નિરાશ્રિતોને સ્વીકારી રહ્યું છે, પણ પેટમાં ઘૂસીને પગ પહોળા કરવાની માનવસહજ વૃત્તિને કારણે થોડાં વર્ષ પછી યુરોપ માટે રાતે પાણીએ રોવાનો વારો આવવાનો છે.