વિખવાદનો અંત લાવવાની શરૂઆત અહીંથી કરો...

અઢારમી લોકસભાનું પહેલું સત્ર શરૂ થઈ રહ્યું છે, પણ ચૂંટણીનું પરિણામ લાવનારાં વોટિંગ મશીન સામેની શંકા હજી દૂર થઈ નથી. કોઈ મતદાન પ્રક્રિયા વાંધાવચકા સામે ‘ફુલપ્રૂફ’ ન હોઈ શકે એવું માની લઈએ તો પણ એ વિશેના મતભેદ દૂર કરવાના પ્રયાસ તો થવા જ જોઈએ.

- હીરેન મહેતા

માર્ચ મહિનામાં ૧૮મી લોકસભા ચૂંટવા માટે મતદાનની તારીખ જાહેર થઈ ત્યારે આ વિવાદ હતો અને એના ત્રણ મહિના પછી મતદાનના સાતેસાત તબક્કા પૂરા થઈ ગયા છે, ચૂંટણીનું પરિણામ આવી ગયું છે અને સરકાર સુદ્ધાં બનીને સત્તાસ્થાને ગોઠવાઈ ગઈ છે તેમ છતાં આ વિવાદ શમવાનું નામ લેતો નથી.

મધ્ય અમેરિકાના પ્રાંત પોર્ટો રિકોમાં યોજાયેલી ચૂંટણીમાં મોટા પાયે ગેરરીતિ થઈ હોવાનું બહાર આવ્યા બાદ નિતનવી ટેક્નોલૉજી પાછળ મસમોટું રોકાણ કરનારા અમેરિકી ઉદ્યોજક ઈલોન મસ્કે ઈલેક્ટ્રોનિક વોટિંગ મશીન (ઈવીએમ)ની વિશ્વસનીયતા સામે શંકા ઉઠાવતાં આપણે ત્યાં પણ વિરોધ પક્ષોને દોડવું’તું ને ઢાળ મળવા જેવો ઘાટ થયો છે. રાહુલ ગાંધીથી માંડી અખિલેશ યાદવ અને મહારાષ્ટ્રમાં શરદ પવાર-ઉદ્ધવ ઠાકરે, વગેરેએ વોટિંગ મશીનની ચોકસાઈ સામે વધુ એક વાર વાંધો લીધો છે. મુંબઈની એક બેઠક પર તો ફેરમતગણતરી પછી ભાજપ-શિવસેના યુતિના ઉમેદવારને પચાસ મેદવારને પચાસથી પણ ઓછા મત વિના જાહેર કરવામાં આવ્યા એટલે વિપક્ષોએ એ બેઠકનું પરિણામ જ સ્થગિત કરવા કહ્યું છે. જો કે ચૂંટણીપંચે આ મશીનની સુરક્ષિતતા તથા વિશ્વસનીયતા સામેના તમામ વાંધા ફગાવી દીધા છે અને આ યંત્રોમાં કોઈ પ્રકારે ગેરરીતિને અવકાશ ન હોવાનું ભારપૂર્વક કહ્યું છે.