આ કન્ડક્ટર ટિકિટ સાથે લાગણીની પણ આપ-લે કરે છે!

સવારે બરાબર સાત કલાકે નડિયાદથી સાળંગપુર જવા માટે એક એસટી બસ ઊપડે છે. બસમાં બેસતી વખતે જેમને એકબીજાનું નામ પણ ખબર હોતાં નથી એ મુસાફરો સાંજે જ્યારે સાળંગપુરથી પરત ફરે ત્યારે એક પરિવાર બની જાય છે. વાત છે ગુજરાતની એકમાત્ર ત્રિવેણીયાત્રા કરતી બસ અને એના કન્ડક્ટરની, જેણે ગુજરાત એસટીની સેવાની વ્યાખ્યા જ બદલી નાખી.

- હેતલ રાવ (અમદાવાદ)

ગુજરાતભરમાં અનેક બસ દોડે છે. લાખો લોકો બસમાં મુસાફરી કરે છે. આખા રાજ્યમાં બધે તો રેલવે પહોંચે નહીં, ત્યાં સામાન્ય લોકો માટે એસટી બસ જ વાહનવ્યવહારનું એક સાધન છે. ઘણી વાર બસની મુસાફરી મુશ્કેલભરી પણ હોય. ખાસ તો પાંચ-સાત કલાકની મુસાફરી કરવાની હોય ત્યારે મુસાફરોને અનેક સમસ્યા થાય. એમાં પણ બસ રસ્તામાં બગડે તો તો પત્યું. ખખડધજ બસ, સમયપાલનનો સદંતર અભાવ, ભરોસો ન રાખી શકાય એવી સેવા અને ક્યારેક કર્મચારીઓનું ઉદ્ધત વર્તન... તમામ રાજ્યોનાં એસટી નિગમ આને કારણે વગોવાયેલાં છે.

જો કે ગુજરાત માર્ગ પરિવહન નિગમની એક એવી પણ બસ છે, જેની સોશિયલ મિડિયા પર ચર્ચા સારાં કારણસર થઈ રહી છે. એ બસ એટલે નડીયાદથી સાળંગપુર જતી ભક્તિ બસ.

એની ચર્ચા થવા પાછળનું મુખ્ય કારણ છે બસના ૪૩ વર્ષના કન્ડક્ટર સંદીપ મહેન્દ્રભાઈ બારોટ, જે માત્ર નોકરી જ નહીં, લોકસેવા પણ કરે છે. નડિયાદ એસટી ડેપોમાંથી રોજ સવારે ભક્તિ બસ ઊપડે. એના પ્રવાસનો આરંભ થાય રાષ્ટ્રગીતથી. હા, નડિયાદ-સાળંગપુર રૂટની બસમાં રોજ રાષ્ટ્રગાન થાય. ગુજરાતની આ પ્રથમ એવી એસટી બસ છે, જેમાં નિયમિત રાષ્ટ્રગીત ગવાતું હોય. આ બસ અરણેજ (બુટ ભવાની માતાનું મંદિર), ગણપતપુરા અને સાળંગપુર એમ ત્રણ ધાર્મિક સ્થાને જતી હોવાથી એને ત્રિવેણી યાત્રાધામ દર્શન બસ તરીકે ઓળખવામાં આવે છે.