સ્ત્રી રાતના સમયે બહાર ન નીકળી શકે?

‘ઘરની આબરૂ’ માટે પુરુષો ઘરબહાર પણ સલામત વાતાવરણ નિર્માણ કરે અને પોતાનું વર્તન બદલે એ વધુ જરૂરી છે.

- ડૉ. મિતાલી સમોવા

આધુનિક શહેરી નવરાત્રિની હકીકત શું છે? છીછરાપણું કે રિક્લેઈમિંગ ધ નાઈટનો ફેમિનિન પાવર મૂવ?

થોડા મહિના અગાઉ કોલકાતામાં એક મહિલા ડૉક્ટરની હત્યા થઈ ત્યારે અને એ અગાઉ પણ કોઈ મહિલા સાથે રાતના સમયે બળાત્કાર-હત્યા-છેડતી કે અન્ય અત્યાચાર થાય ત્યારે ઘણા લોકો તરફથી એક સૂચન આવે જ કે દીકરીએ રાતના સમયે બહાર ન નીકળવું જોઈએ. ક્યારેય આપણો સમાજ પુરુષોને સૂચન કરતો નથી કે કોઈ સ્ત્રી સાથે દુષ્કર્મ ન કરો! આનો ગર્ભિત અર્થ એવો થાય કે આપણો સમાજ છૂપી અને સક્રિય, બન્ને રીતે પુરુષોને અત્યાચારી બનવા માટે પ્રોત્સાહન સહિત છૂટો દોર આપે છે.

આવા સામાજિક દંભ સામે વિદ્રોહ પોકારતી જાગ્રત સ્ત્રીઓ વારંવાર રિક્લેઈમ ધ નાઈટ નામે આંદોલન ચલાવી અડધી રાત્રે ઘરથી બહાર રૅલી, ધરણા અને પ્રદર્શન માટે નીકળતી હોય છે. રાતના સમયે હરવા-ફરવા પર સ્ત્રીઓનો પણ સમાન અધિકાર છે, સમાજની ફરજ સ્ત્રીઓ માટે સુરક્ષિત વાતાવરણ બનાવવાની છે, નહીં કે બિનજરૂરી શિખામણો આપવાની અને કશું પણ થાય તો દરેક વખતે એમાં સ્ત્રીનો વાંક કાઢવાની જરૂર નથી એવું સ્થાપિત કરવાની આ ચળવળ છે.