બાઈક પર દીકરાને સાથે રાખી નીકળતી ડિલિવરી ક્વીન

ફડ ટ્રાફિકથી ધમધમતા રસ્તા પર કોઈ યુવતીને પોતાના બાળકને બાઈક પર બેસાડીને ડિલિવરી કરવા નીકળતી જોઈએ તો જરૂર કુતૂહલ થાય. સંતાનના ઉજ્જ્વળ ભવિષ્ય માટે એક માતાએ અજાણ્યા શહેરમાં ફૂડ ડિલિવરી કરવાનું પડકારભર્યું કામ પસંદ કરીને માતૃશક્તિ સાથે મહેનતનો રંગ બતાવ્યો છે.

- દેવેન્દ્ર જાની

ਮੈਂ તો મહારાષ્ટ્ર કે નાગપુર કી રહનેવાલી હૂં, રાજકોટ મેરે લિયે નયા હૈ, ઘર ચલાને કે લિયે મહેનત તો કરની પડતી હૈ, મુશ્કિલ કામ હૈ, લેકિન દો પૈસે કમાને લિયે બચ્ચે કો બાઈક પર બીઠા કે પૂરે દિન ફૂડ ડિલિવરી કે લિયે નિકલતી હૂં...

રાજકોટના સતત ટ્રાફિકથી ધમધમતા હનુમાન મઢી ચોકમાં બાઈક પર બેસીને છલકાતા આત્મવિશ્વાસ સાથે બોલાતા આ શબ્દો છે રચના સરાટે નામની યુવતીના.

રાજકોટમાં બાઈક પર કોઈ યુવતી ફૂડ ડિલિવરી કરવા નીકળે અને એ પણ આગળ પોતાના બાળકને બેસાડીને નીકળે તો સ્વાભાવિક છે કે આશ્ચર્ય થાય, કારણ કે આજે પણ સમાજમાં એવી માનસિકતા જીવે છે કે અમુક કામ તો પુરુષો જ કરી શકે. મહિલાઓથી અમુકતમુક કામ ન જ થાય... આવું માનનારા અને બોલનારા લોકોને ૨૭ વર્ષની એક સામાન્ય પરિવારમાંથી આવતી મહેનતુ યુવતીએ એના કામ થકી શકતા નથી.

ઘરકામ માટે કોઈ રાખવા તૈયાર નહોતું એટલે પેટીયું રળવા રસ્તે ઊતરવું પડ્યું.

જો કે દરેક યુવતીની જેમ રચનાએ પણ પહેલાં કોઈ સારી નોકરીની જ તલાશ કરી હતી. વતન નાગપુરમાં પરિવાર સાથે રહેતી રચનાએ કૉલેજના પ્રથમ વર્ષ સુધી અભ્યાસ કર્યો ત્યારે જ એ એક માર્કેટિંગ કંપની સાથે જોડાઈ હતી. લગભગ બે વર્ષ અગાઉ આ કંપનીનું કામ રાજકોટ આવતાં આ યુવતી પણ રાજકોટ આવી ગઈ. થોડા સમય બાદ કંપની બંધ થઈ ગઈ. હવે પોતાનું અને બે વર્ષના બાળકનું ભરણપોષણ કરવાની જવાબદારી આવી પડી. આ યુવતીએ શરૂઆતમાં બાળકને લઈને ઘરકામ કરવા જવાનું નક્કી કર્યું, પરંતુ નાનું બાળક સાથે આવતું હોવાથી કોઈ ઘરકામ આપવા તૈયાર થતું નહીં. લોકોનાં ઘર મોટાં હતાં, પણ મન છોટાં હતાં. જ્યાં પણ કામ માગવા જાય ત્યાં એનું બાળક ઘરમાં તોડફોડ કે નુકસાન કરશે એવી આશંકા વ્યક્ત કરીને કામની ના પાડી દેવામાં આવતી હતી.