విద్య పేరుతో ఇంత వ్యాపారమా..?

• నల్లగొండ జిల్లా, నాగార్జునసాగర్ సెయింట్ జోసెఫ్స్ పాఠశాలలో ఎడ్యుకేషన్ సొసైటీల దందా.. • నిజాలు రాస్తే.. “ఆదాబ్" పై బురదజల్లే ప్రయత్నం 

• సెయింట్ జోసెఫ్స్ పాఠశాల యాజమాన్యం పచ్చి అబద్ధాలను నిజాలుగా ప్రచారం చేసుకుంటున్న వైనం 

• కల్పితాలను నిజం చేస్తూ.. నిజాన్ని అబద్ధం చేస్తున్నదెవరు? 

• 1973లో సెయింట్ జోసెఫ్స్ కాన్వెంట్ సొసైటీ రిజిస్టర్ అయితే.. 1965లోనే ప్రభుత్వ భూమి ఎలా కేటాయించారు? 

• సంబంధం లేని జీసస్ మేరీ జోసెఫ్ (జె.ఎమ్.జె) సొసైటీకి ఎయిడెడ్ గుర్తింపునిచ్చిన ఆర్.జే.డి

• ఏది నిజం.? ఏది అబద్దం..?

హైదరాబాద్ 01 మార్చి (ఆదాబ్ హైదరాబాద్ బ్యూరో): విద్య అనే పవిత్రమైన రంగం వ్యాపారంగా మారుతున్నప్పుడు పత్రికలు, మీడియా వ్యవస్థలు అప్పుడప్పుడు ఆ సంస్థలను ప్రశ్నించడం, చురకలు పెట్టడం సహజమైనది. ఆ బాధ్యత మీడియాపై ఎంతగానో ఉంది. ఇందులో భాగంగానే “ఆదాబ్” ఫిబ్రవరి 14.వ తేదీన “నల్లగొండలో ఎయిడెడ్ స్కూళ్ళ దందా" అనే శీర్షికన ఒక వార్తను ప్రచురించింది. నల్లగొండ జిల్లా నాగార్జునసాగర్ పట్టణంలోని సెయింట్ జోసెఫ్స్ అనే ఎయిడెడ్ పాఠశాల ప్రాంగణంలో వివిధ రకాలైన ఎడ్యుకేషన్ సొసైటీల పేరుతో ఇక్కడ విద్యను వ్యాపారంగా మార్చారని, ప్రభుత్వ భూమిలో నిబంధనలకు విరుద్ధంగా పక్కా భవనాలు, రెసిడెన్షియల్ ఇండ్లు నిర్మించుకున్నారని, మధ్యాహ్న భోజన పథకంలో కూడా అవకతవకలు జరిగిన ఆరోపణలు ఉన్నాయనే పలు అంశాలు సదరు వార్త యొక్క సారాంశం.