కాశ్మీర్ లో కొలువుదీరిన కొత్త ప్రభుత్వం

ఫ్రెండ్లీ పోలీసింగ్ ఉండాలని డిజిపికి ఆదేశాలు సిఎం పదవి ముళ్ల కిరీటం లాంటిది : అబ్దుల్లా

ముఖ్యమంత్రిగా ఒమర్ అబ్దుల్లా ప్రమాణం

కేబినేట్లోకి ఐదుగురు మంత్రులకు చోటు

ఓ మహిళా మంత్రికి అవకాశం ఇచ్చిన సిఎం

న్యూఢిల్లీ 16 అక్టోబర్ (ఆదాబ్ హైదరాబాద్): జమ్మూ కశ్మీర్ నూతన ముఖ్యమంత్రిగా ఒమర్ అబ్దుల్లా ప్రమాణస్వీకారం చేశారు. లెఫ్టినెంట్ గవర్నర్ మనోజ్ సిన్హా ఆయనతో ప్రమాణం చేయించారు. బుధవారం ఉదయం 11.30 గంటలకు శ్రీనగర్ లోని షెరి కశ్మీర్ ఇంటర్నేషనల్ కాన్ఫరెన్స్ సెంటర్లో జరిగిన కార్యక్రమంలో ఒమర్ ప్రమాణస్వీకారం చేశారు.ఐదుగురిని తన క్యాబినెట్లోకి తీసుకున్నారు. వీరిలో నేషనల్ కాన్ఫరెన్స్ నుంచి నలుగురు, ఒక స్వతంత్ర అభ్యర్థి ఉన్నారు.ఎన్సీతో కూటమిగా ఎన్నికల్లో పోటీ చేసిన కాంగ్రెస్ పార్టీ నూతన ప్రభుత్వంలో చేరడం లేదని, బయట నుంచి మద్దతిస్తామని తెలిపింది. శ్రీనగర్లోని షేర్-ఇ-కశ్మీర్ ఇంటర్నేషనల్ కాన్ఫరెన్స్ సెంటర్లో జరిగిన ప్రమాణ స్వీకార కార్యక్రమానికి కాంగ్రెస్ అగ్రనేతలు మల్లికార్జున ఖర్గే, రాహుల్ గాంధీ, ప్రియాంకా గాంధీలు హాజరయ్యారు. వీరితో పాటు ఇండియా కూటమికి చెందిన ఇతర నేతలు వచ్చారు.