நாளை தீபாவளி கொண்டாட்டம் கடைசிநேர விற்பனை படுஜோர்

கடைவீதிகளில் அலைமோதிய கூட்டம் * சொந்த ஊர் செல்ல பஸ், ரயில்களில் மக்கள் படையெடுப்பு * இனிப்பு, பட்டாசு விற்பனை களைகட்டியது

தீபாவளி பண்டிகை நாளை கொண்டாடப்பட உள்ளது. இதை முன்னிட்டு நேற்று தமிழகம் முழுவதும் துணிகள் வாங்க கடை வீதிகளில் மக்கள் கூட்டம் அலைமோதியது. சென்னையில் இருந்து சொந்த ஊர்களுக்கு மக்கள் பஸ், ரயில்களில் படையெடுத்தனர். இதே போல ஜவுளி, பட்டாசு விற்பனையும் களைகட்டியது. இன்றும் விற்பனை இறுதிக்கட்டத்தை எட்டும் என்பதால் கூட்டம் இன்னும் அதிகரிக்க வாய்ப்புள்ளது. மேலும், வெளியூர் செல்லும் பொதுமக்களின் வசதிக்காக பள்ளி, கல்லூரிகளுக்கு தமிழ்நாடு அரசு அரை நாள் விடுப்பு அறிவித்துள்ளது.

தீபாவளி பண்டிகை நாளை (வியாழக்கிழமை) கொண்டாடப்படுகிறது. தீபாவளியை பொதுமக்கள் புத்தாடை உடுத்தியும், பட்டாசுகள் வெடித்தும், நண்பர்கள்-விருந்தினர்களுக்கு இனிப்புகளை வழங்கியும் கொண்டாடுவது வழக்கம். இந்நிலையில் தீபாவளி பண்டிகைக்கு இன்று ஒரு நாள் மட்டுமே எஞ்சியுள்ளது. இருந்தாலும் பொதுமக்கள் தீபாவளி ‘பர்சேஸ்’ செய்வதை ஒரு மாதத்திற்கு முன்னரே தொடங்கினர். நாளை தீபாவளி பண்டிகை கொண்டாடப்பட உள்ளதால் நேற்று காலை முதல் தீபாவளி பொருட்கள் வாங்க மக்கள் படையெடுத்தனர். இதனால், தமிழகம் முழுவதும் கடை வீதிகளில் தீபாவளி விற்பனை நேற்று களைகட்டியது.

சென்னையை பொறுத்தவரை கடந்த ஒரு மாதமாகவே கூட்டம் அதிகமாக காணப்பட்டது. சென்னையின் முக்கிய வணிக பகுதிகளான தி.நகர், புரசைவாக்கம், பிராட்வே, மயிலாப்பூர், வண்ணாரப்பேட்டை, தாம்பரம், குரோம்பேட்டை உள்ளிட்ட பல்வேறு பகுதிகளில் மக்கள் கூட்டம் வழக்கத்தை விட அதிகமாக காணப்பட்டது. ஒவ்வொருவரும் குடும்பத்துடன் வந்து துணிகள், பாத்திரங்கள் உள்ளிட்ட ெபாருட்களை வாங்கி சென்றனர்.