மணிப்பூரில் நடந்த திடீர் தாக்குதலில் தமிழ்நாட்டை சேர்ந்த எஸ்பி படுகாயம்

மணிப்பூரில் குக்கி மக்களின் போராட்டத்தின்போது வெடித்த வன்முறையில், தமிழ்நாட்டைச் சேர்ந்த எஸ்பி மனோஜ் பிரபாகர் உள்ளிட்ட போலீசார் படுகாயம் அடைந்தது தெரிய வந்துள்ளது.

மணிப்பூரில் கடந்த ஒன்றரை ஆண்டுகளை கடந்து அங்கு வசிக்கும் மெய்பீஸ், குக்கி இன மக்கள் இடையே இனக்கலவரம் நிகழ்ந்து வருகிறது. காங்போக்பி மாவட்டத்தில் சைபோல் கிராமத்தில் கடந்த 31ம் தேதி குக்கி-சோ பழங்குடியினத்தை சேர்ந்த பெண்கள் மறியல் போராட்டத்தில் ஈடுபட்டனர். அப்போது பாதுகாப்பு படையினர் தடியடி நடத்தி அவர்களை கலைத்துள்ளனர்.

இந்த தடியடியின்போது பெண்கள் சிலர் காயமடைந்ததாக கூறப்படுகின்றது. இதனை கண்டித்து குக்கி சோ சமூகத்தை சேர்ந்தவர்கள் போராட்டங்களில் ஈடுபட்டு வருகின்றனர். கண்காணிப்பு மற்றும் பாதுகாப்பு பணியில் ஈடுபடுத்தப்பட்டுள்ள எல்லைப்பாதுகாப்பு படைவீரர்கள், சிஆர்பிஎப் மற்றும் போலீசாரை திரும்ப பெற வேண்டும் என்று அவர்கள் வலியுறுத்தி வருகின்றனர். அவர்களது கோரிக்கையை ஏற்று பாதுகாப்பு படை வீரர்களை திரும்ப பெறாததை கண்டித்து நேற்று முன்தினம் மாலை காங்போக்பி மாவட்டத்தில் உள்ள மாவட்ட காவல் கண்காணிப்பாளர் அலுவலகத்தை மர்ம கும்பல் ஒன்று தாக்கி சேதப்படுத்தி இருக்கிறது.