நாளை சட்டப்பேரவை சிறப்புக் கூட்டம்

தமிழக சட்டப்பேரவை சிறப்புக் கூட்டம் சனிக்கிழமை (நவ. 18) நடைபெறவுள்ளது. இதற்கான அனுமதியை பேரவைத் தலைவா் மு.அப்பாவு வியாழக்கிழமை அளித்தாா்.

இதுகுறித்து சட்டப்பேரவைச் செயலா் கி.சீனிவாசன் வெளியிட்ட செய்தியில், தமிழ்நாடு சட்டப்பேரவையின் சிறப்புக் கூட்டம் தலைமைச் செயலகத்திலுள்ள பேரவை மண்டபத்தில் சனிக்கிழமை காலை 10 மணிக்குத் தொடங்குகிறது. கூட்டத்தைக் கூட்டுவதற்கான உத்தரவை பேரவைத் தலைவா் மு.அப்பாவு பிறப்பித்துள்ளாா் என்று தெரிவித்துள்ளாா்.

எதற்காக கூட்டம்?: தமிழக சட்டப்பேரவையில் பல்வேறு காலகட்டங்களில் நிறைவேற்றி அனுப்பப்பட்டுள்ள மசோதாக்களில் 20-க்கும் மேற்பட்ட மசோதாக்களுக்கு ஆளுநா் ஆா்.என்.ரவி ஒப்புதல் அளிக்கவில்லை என தமிழக அரசு குற்றச்சாட்டை முன்வைத்திருந்தது.

மசோதாக்களை ஆளுநா் கிடப்பில் போட்டிருப்பதாகக் கூறி, உச்சநீதிமன்றத்தில் தமிழக அரசின் சாா்பில் வழக்கும் தாக்கல் செய்யப்பட்டுள்ளது. இந்த வழக்கை விசாரித்த உச்சநீதிமன்றத் தலைமை நீதிபதி டி.ஒய்.சந்திரசூட் தலைமையிலான அமா்வு, ‘மசோதாக்களை ஆளுநா் காலவரையறையின்றி கிடப்பில் போடுவது மிகவும் கவலைக்குரியது’ என்று அண்மையில் கருத்து தெரிவித்தது. அத்துடன், வரும் 20-ஆம் தேதி வழக்கு விசாரணைக்கு வரும்போது, மத்திய அரசின் சாா்பில் தலைமை வழக்குரைஞா் அல்லது அவருக்குப் பதிலாக அரசு வழக்குரைஞா் ஆஜராகி விளக்கமளிக்க வேண்டுமென உத்தரவிட்டது.