கேஜரிவாலுக்கு இடைக்கால ஜாமீன் : சிபிஐ வழக்கில் சிறைவாசம் தொடர்கிறது

தில்லி மதுபான (கலால்) கொள்கை ஊழல் தொடர்புடைய அமலாக்கத்துறையின் சட்டவிரோத பணப் பரிவர்த்தனை வழக்கில் தில்லி முதல்வரும் ஆம் ஆத்மி கட்சியின் தேசிய அமைப்பாளரும் ஆன அரவிந்த் கேஜரிவாலுக்கு உச்சநீதிமன்றம் வெள்ளிக்கிழமை இடைக்கால ஜாமீன் வழங்கியது.

எனினும், இதே விவகாரத்தில் கடந்த 26-ஆம் தேதி சிபிஐ கைது செய்த வழக்கில், அவரது நீதிமன்றக் காவல் ஜூலை 25-ஆம் தேதி நீட்டிக்கப்பட்டுள்ளது. இதனால், இடைக்கால ஜாமீன் கிடைத்தும் கேஜரிவாலின் சிறைவாசம் தொடர்கிறது.

மக்களவைத் தேர்தல் பிரசாரப் பணிக்காக சில நிபந்தனைகளுடன் கேஜரிவாலுக்கு உச்சநீதிமன்றம் கடந்த மே 10-ஆம் தேதி இடைக்கால ஜாமீன் வழங்கியது. தேர்தல் பிரசாரம் முடிந்த பின் கேஜரிவால் மீண்டும் சிறைக்குச் சென்றார்.

இந்நிலையில், இந்த வழக்கை வெள்ளிக்கிழமை விசாரித்த உச்சநீதிமன்ற நீதிபதிகள் சஞ்சீவ் கன்னா, தீபாங்கர் தத்தா ஆகியோர் அடங்கிய அமர்வு, கேஜரிவாலுக்கு இடைக்கால ஜாமீன் வழங்கியது.

இதுதொடர்பாக நீதிபதி சஞ்சீவ் கன்னா 64 பக்கங்கள் கொண்ட அளித்துள்ள தீர்ப்பின் விவரம்: வழக்கின் விசாரணைக்காக கேஜரிவால் கைது செய்யப்பட்டு 90 நாள்களுக்கும் மேலாக சிறையில் இருந்துள்ளார். இதில், தனிநபரின் மீறப்படுகிற சுதந்திரம் என்பது குறித்து நீதிமன்றம் கவலை கொள்கிறது.