சமமான தேர்வுமுறை தேவை!

தமிழ்நாடு அரசுப் பணியாளர் தேர்வாணையம் ஏனைய தேர்வாணையங்களுக்கு முன்மாதிரியாக, பல புதுமைகளை போட்டித் தேர்வுகளில் அறிமுகம் செய்த பெருமைக்குரியது. இந்தியத் தேர்வாணையங்களுள் தொன்மையானது.

- மு. சிபிகுமரன்

கடந்த சில ஆண்டுகளாக இந்தியக் குடிமைப் பணிகளில் தமிழ்நாட்டுத் தேர்வர்களின் தேர்ச்சி விகிதம் கணிசமாகக் குறைந்து வருகிறது. இச்சூழலில் தமிழ்நாடு அரசுப் பணியாளர் தேர்வாணையம் போட்டித் தேர்வுகளை எழுதி வருகின்ற தமிழ்நாட்டுத் தேர்வர்களுக்கு உற்ற நம்பிக்கையாய் விளங்கி வருகின்றது என்பது நிதர்சனம்.

ஓர் ஆண்டில் பல்வேறு வகையான தேர்வுகளின் மூலம் ஏறத்தாழ 20 ஆயிரம் பணியிடங்களை இத்தேர்வாணையம் நிரப்பி வருகிறது. சமீப காலங்களில் விரைவாகத் தேர்வு முடிவுகளை வெளியிடுவதற்கான முயற்சிகளை மேற்கொண்டு அதனை வெற்றிகரமாகவும் நடைமுறைப்படுத்தி வருகிறது.

தேர்வாணையத்திற்கு சமீபத்தில் நியமிக்கப்பட்ட தலைவர் மற்றும் செயலர் ஆகியோர் விரைந்து செயல்படுகின்ற ஆற்றலும், துணிந்து முடிவெடுக்கின்ற திறனும் பெற்றவர்கள் என்பது அவர்களது கடந்த காலப் பணித் திட்டங்களை கவனித்தவர்கள் நன்கு அறிவர். அதனால் தேர்வாணைய செயல்முறைகளில் குறிப்பிடத்தக்க நேர்மறையான மாற்றங்களை தேர்வர்கள் எதிர்நோக்க முடியும்.

சமீபத்தில் குரூப் 2ஏ முதன்மைத்தேர்வு ஆன்லைன் என்பது நீக்கப்பட்டு முந்தைய தேர்வுகள்போல ஓஎம்ஆர் கொள்குறிப் படிவத்தின் வழியே நடைபெறும் என அறிவிக்கப்பட்டுள்ளது. நடைமுறைச் சாத்தியங்களை ஆராய்ந்த பிறகே இத்தகைய முடிவிற்கு தேர்வாணையம் வந்திருக்க முடியும்.

கடந்த காலங்களில் இது போன்றதொரு முயற்சியினை மேற்கொண்டு பல்வேறு குழப்பங்கள் நேர்ந்ததனை தேர்வாணையம் மறந்திருக்க முடியாது. எனினும், குறைவான எண்ணிக்கையில் தேர்வர்கள் எழுதுகின்ற தேர்வுகளில் இதனை வெற்றிகரமாகச் செயல்படுத்திய பிறகு தேர்வாணையம் இதுபற்றி யோசிக்கலாம்.

அதேபோல தேர்வாணையம் கவனத்தில் கொள்ள வேண்டிய மற்றொரு முக்கியமான விஷயத்தினை இங்கே முன்வைக்க வேண்டியது அவசியமாகிறது.

200 வினாக்கள் கொண்ட குரூப் 2 மற்றும் 2ஏ முதல்நிலைத் தேர்வினைப் பொருத்தவரை 100 வினாக்கள் பொது அறிவு மற்றும் திறனறிதல் பகுதியில் இருந்தும் ஏனைய 100 வினாக்கள் பொதுத்தமிழ் அல்லது பொது ஆங்கிலம் ஆகிய பகுதிகளில் இருந்தும் கொள்குறி வினாக்களாகவே இடம் பெற்று வருகின்றன.

மேலும் குரூப் 2ஏ முதன்மைத் தேர்வும் கொள்குறி வினாக்களாக பொது அறிவு மற்றும் திறனறிதல் நீங்கலாக பொதுத்தமிழ் அல்லது பொது ஆங்கிலத்தில் இருந்து 60 வினாக்கள் இடம் பெறுகின்றன.