குரூப் பி பணியிடங்களுக்கு வயது தளர்வு கவர்னரிடம் திமுக எம்.எல்.ஏ.,க்கள் வலியுறுத்தல்

புதுவை கவர்னர் கைலாஷ்நாதனை, மாநில திமுக அமைப்பாளரும், எதிர்க்கட்சித் தலைவருமான சிவா தலைமையில் எம்.எல்.ஏ.க்கள் அனிபால் கென்னடி, செந்தில்குமார், சம்பத், திமுக அவைத் தலைவர் எஸ்.பி.சிவக்குமார் ஆகியோர் சந்தித்து மனு அளித்தனர்.

அந்த மனுவில் அவர்கள் கூறியிருப்பதாவது, புதுவை மாநிலத்தில் கல்வி வளர்ச்சிக்கு அளித்து வரும் ஊக்கத்தின் காரணமாக ஆண்டுதோறும் ஆயிரக்கணக்கான பட்டதாரிகள் வெளிவருகின்றனர். அவர்களுக்கு வேலை வாய்ப்பு மிகக் குறைவாக உள்ளது.

பட்டதாரிகள் வயிற்றுப் பிழைப்பிற்காக அண்டை மாநிலங்களுக்கு வேலை தேடி ஓடும் நிலை ஏற்பட்டுள்ளது. அரசு துறைகளில் வேலைவாய்ப்புகள் இருந்தும், முறையாக பணியாளர் தேர்வு வாரியம் இல்லாததால், குரூப் 1 மற்றும் 2 பணியிடங்களுக்கு காலத்தோடு பணியாளர்களை தேர்வு செய்ய முடியாத அவலம் தொடர்கிறது.