மகா கும்பமேளாவிற்கு வருகை: திரிவேணி சங்கமத்தில் இன்று பிரதமர் மோடி புனித நீராடினார்!

துறவிகளுடன் உரையாடினார்!!

- 

உத்தரப் பிரதேசத்தில் நடைபெற்று வரும் மகா கும்பமேளா நிகழ்வில் பிரதமர் மோடி இன்று காலை கலந்து கொண்டு திரிவேணி சங்கமத்தில் புனித நீராடினார். மேலும் அங்குள்ள அனுமன் கோவிலுக்கு சென்று வழிபாடு நடத்தினார். அதைத் தொடர்ந்து சாதுக்கள், துறவிகளை சந்தித்து அவர்களுடன் கலந்துரையாடினார். பிரதமரின் வருகையை ஒட்டி பிரயாக்ராஜ் நகரம் முழுவதும் பலத்த பாதுகாப்பு ஏற்பாடுகள் செய்யப்பட்டிருந்தது.

உத்தரப் பிரதேசத்தில் 144 ஆண்டுகளுக்கு ஒரு முறை நடைபெறும் ஆன்மிக கலாச்சார நிகழ்வான மகா கும்பமேளா கடந்த ஜனவரி 13ந்தேதி சிறப்பாக தொடங்கிய நிலையில், வரும் பிப்ரவரி 26ந்தேதி சிவராத்திரி நாள் வரை 45 நாட்களுக்கு தொடர்ந்து நடைபெற உள்ளது. கங்கை, யமுனை, சரஸ்வதி உள்ளிட்ட மூன்று நதிகள் சங்கமிக்கும் திரிவேணி சங்கமம் எனும் புனித பகுதியில் பல லட்சக்கணக்கான பக்தர்கள் தினமும் புனித நீராடி வருகின்றனர். மகா கும்பமேளாவுக்கு இந்த ஆண்டு 45 கோடி பக்தர்கள் வருகை தருவார்கள் என்று எதிர்பார்க்கப்படும் நிலையில், ஏற்கனவே 38 கோடிக்கும் மேற்பட்ட பக்தர்கள் மகா கும்பமேளாவுக்கு வருகை புரிந்து திரிவேணி சங்கமத்தில் புனித நீராடியுள்ளனர். 10 ஆயிரம் ஏக்கர் பரப்பளவில் மகா கும்பமேளா நிகழ்ச்சிக்கான ஏற்பாடுகள் செய்யப்பட்டுள்ளன. குறிப்பாக 1,800 ஹெக்டேர் பரப்பளவில் வாகன நிறுத்த இடம், 2,750 கண்காணிப்பு கேமராக்கள், 15 ஆயிரம் துப்புரவு பணியாளர்கள், 25 ஆயிரம் தொழிலாளர்கள், 24 மணிநேரமும் செயல்படும் கட்டுப்பாட்டு மையம் உள்ளிட்ட பல்வேறு வசதிகளை உ.பி. அரசு ஏற்படுத்திக் கொடுத்துள்ளது.