ફ્લેટની રેકી કરવા આવેલા નકલી પોલીસકર્મીને મહિલાએ બહાદુરીપૂર્વક પીછો કરી ઝડપી પાડ્યો

મહિલાએ યુવકને નરોડાના ગેલેક્સી સિનેમા પાસેથી પકડ્યોઃ યુવકે પોલીસનું આઈકાર્ડ ગટરમાં ફેંકી દેતાં તેનો ભેદ ખૂલી ગયો

અમદાવાદ, મંગળવાર

શહેરના કુબેરનગર વિસ્તારમાં આવેલા ફ્લેટમાં રેકી કરવા માટે આવેલા નકલી પોલીસને મહિલાએ નરોડાના ગેલેક્સી સિનેમા નજીકથી પકડી પાડ્યો હોવાની ઘટના સામે આવી છે. નરોડા પોલીસ સ્ટેશનમાં ફરજ બજાવતો હોવાનું કહીને યુવક ફ્લેટમાં રેકી કરતો હતો ત્યારે મહિલાએ તેની પૂછપરછ કરી હતી. યુવક શંકાસ્પદ લાગતાં મહિલાએ તેનો પીછો કર્યો હતો અને ગેલેક્સી સિનેમા પાસે ઝડપી લીધો હતો.

શહેરના કુબેરનગર વિસ્તારમાં આવેલા કિષ્ના એવન્યૂમાં રહેતી અનીતા બલવાનીએ સરદારનગર પોલીસ સ્ટેશનમાં પ્રકાશ વાઘેલા નામના શખ્સ વિરુદ્ધ ફરિયાદ કરી છે. અનીતા બલવાની તેના પિયરમાં બે દીકરીઓ સાથે રહે છે. ગઇ કાલે બે વાગ્યાની આસપાસ અનીતા બલવાની બજારમાંથી પોતાના ઘરે આવી હતી ત્યારે ફ્લેટ સામે એક યુવક શંકાસ્પદ રીતે ઊભો હતો.