૧૨૦૦ બેડની હોસ્પિટલના બેઝમેન્ટમાં કરોડો રૂપિયાનાં સાધનો ફેંકી દેવાયાં

હોસ્પિટલમાં જૂનાં સાધનોનો ઉપયોગ કરવામાં આવે છે અને નવાં સાધનો સડી રહ્યાં છે પણ કોઈને તેની પરવા જ નથી

અમદાવાદ, શનિવાર

દર્દીઓની સારવાર કરવા બાબતે અમદાવાદની સિવિલ હોસ્પિટલ માત્ર રાજ્યમાં જ પણ કેટલાક કારણે નહીં, દેશ-દુનિયામાં જાણીતી છે, પરંતુ ભ્રષ્ટ સત્તાધીશોના હોસ્પિટલની છબી ક્યાંક ને ક્યાંક ખરડાઇ રહી છે. સિવિલના કેમ્પસમાં આવેલી ૧૨૦૦ બેડની હોસ્પિટલના બેઝમેન્ટમાં જે મેડિકલ સાધનો ખડકી દેવામાં આવ્યાં છે તે જોતાં સત્તાધીશોએ કરોડો રૂપિયા પોતાની તિજોરીઓમાં ખડકી દીધા હોય તેવું લાગી રહ્યું છે. ગઇ કાલે ‘સમભાવ મેટ્રો’એ ‘સિવિલ હોસ્પિટલમાં લાખો રૂપિયાનો ભંગાર સડી રહ્યો છેઃ તંત્ર બેદરકાર' શીર્ષક સાથેનો અહેવાલ પ્રસિદ્ધ કર્યો હતો તેના કરતાં ૧૦૦ ગણાં વધારે મેડિકલ સાધનો ભંગાર જેવી સ્થિતિમાં ૧૨૦૦ બેડની હોસ્પિટલમાં દફન કરી દેવામાં આવ્યાં છે. દફન થયેલાં આ મેડિકલ સાધનો હોસ્પિટલના સત્તાધીશોની ખોરી નીતિનો પર્દાફાશ કરે છે.